_To my right worshupfull cosygne, John Paston of Norwyche, Squyer._
[Sidenote: 1450 / MAY 6]
Right worshupfull sir, I recomaunde me unto yow in the most goodly wyse
that y can; and forasmuche as ye desired of me to sende yow worde of
dyvers matirs here, whiche been opened in the Parliament openly, I sende
yow of them suche as I can.
First moost especiall, that for verray trowthe upon Saterday[148.3] that
last was, the Duke of Suffolk was taken in the see, and there he was
byheded, and his body with the appurtenaunce sette at lande at Dover,
and alle the folks that he haad with hym were sette to lande, and haad
noon harme.
Also the Kyng hath sumwhat graanted to have the resumpsion agayne in
summe, but nat in alle, &c.
Also yef ye purpose to come hydre to put up your bylles, ye may come now
in a good tyme; for now every man that hath any, they put theme now
inne, and so may ye, yif ye come with Godds grace to your pleasur.
Ferthermore, upon the iiij^th day of this monthe, the Erle of
Devenesshire[148.4] come hydre with iij^c. [300] men wel byseen, &c.
And upon the morow after my Lord of Warrewyke[148.5] with iiij^c. [400]
and moo, &c.
Also, as hyt ys noysed here Calys shal be byseged withynne this vij.
dayes, &c.
God save the Kyng, and sende us pees, &c.
Other tithyngs be ther noon here, but Almyghty God have yow in his
kepyng.
Writen at Leycestre, the vj. day of May.
Your cosigne,