_To my right trusty and right enterly welbeloved frend, John Paston,
Squier._
[Sidenote: 1450 / APRIL 22]
Right t[r]usty and enterly welbeloved frend, I grete you welle, and wyll
ze wite that a man of Osberd Monford hath declared me how the said
Osberd is infourmed that Danyelle shuld be pourposed to enter in the
place of Braystone. And as fer as I can undirstande, Danyelle is come in
to this cuntre, for none other cause but for to have suche as the Kyng
hath gifen hym in Rysyng, which lieth not in me ner in none of the
Kynges subgectes to go ageyns hise graunte and plesaunce. And in cas the
said Danyelle wold enter upon the said Osberd otherwise than lawe wold,
seyng the said Osberd is my tenaunt and homager, it is my part to holde
with hym rather than with Danyelle in hise right, which I wylle do to my
pouer. And as zet I can not apperceyve that Danyelle wylle labore in any
maters in this cuntre; and if he wylle be of good governance, I am wel
paied. And in cas that he wold do wrong to the lesse gentilman in the
chirre, it shal not lye in hise pouer be the grace of God. He letethe me
wite that he wylle be wel governed in tyme commyng.
Right trusty and enterly wel beloved frend, I pray God have you in hise
governance. Writen at Midelton, the xxij. day of Aprille.