_To John Paston, dwellyn in the Inder In of the Tempyll, att London,
be thys letter delyverd in hast._
[Sidenote: 1450 / MARCH 11]
Son, I grete yow, and send yow Godds blyssyng, and myn; and as for my
doughtyr your wyfe, che faryt well, blyssyd be God, as a woman in hyr
plyte may do, and all your sonys and doughtrys.
And for as meche as ye will send me no tydyngs, I send yow seche as ben
in thys contre. Rychard Lynsted cam thys day fro Paston, and letyt me
wete that on Saturday last past Dravale, halfe brother to Waryn Harman,
was takyn with enemyis, walkyn be the se syde, and have hym forthe with
hem; and they tokyn ij. pylgremys, a man and a woman, and they robbyd
the woman, and lete hyr gon, and ledde the man to the see, and whan they
knew he was a pylgreme, they geffe hym monei, and sett hym ageyn on the
lond. And they have thys weke takyn iiij. vesselys of [_i.e._ off]
Wyntyrton; and Happysborough and Ecles men ben sore aferd for takyn of
mo [_i.e._ more (?)], for ther ben x. grete vesselys of the enemyis; God
yeue grace that the see may be better kepte than it is now, or ellys it
chall ben a perlyous dwellyng be the se cost.
I pray yow grete well your brethyrne, and sey hem that I send hem Goddis
blyssyn and myn; and sey William that if Jenett Lauton be not payd for
the krymson cort wheche Alson Crane wrote to hyr for in hyr owyn name,
that than he pay hyr, and see Alson Cranys name strekyn owt of hyr boke,
for che seithe che wyll aske no man the money butt Alson Crane. And I
pray yow that ye wyll remembr the letter that I sent yow last, and God
be with yow.
Wretyn att Norwyche, the Wedenesday next before Sent Gregory.