_To my ryght worshepfull master John Paston at London in the Inner
Temple._
[Sidenote: 1449 / NOV. 30]
Plese it your good maistershep to knowe that my maisteresse your wyff
recomaundeth here to yow and fareth well, blyssed be God, and all your
menye faren well also and recomaunde hem to yaw, &c. I was with my lord
of Oxenford and dede myn erand, and I found his good lordshep well
disposed towardys yow, for he seid if he were sent to for to come to,
&c., if it kepe faire weder he wold not tarye, and if it reygned he wold
not spare. More over I spak with Pertrych as touchyng the letter sent to
my lord Moleyns; he seyth that he was privy to the wrytyng and wele a
vowe it by record of xx. persons, but he wold name to me no persone; and
so he and I accorded not fully. And I bad hym remembre hym that he myght
not abyde there if ye wold have hym owt. And he seid he knewe well that.
But he seid, if ye put heem out, ye shuld be put owt sone after a geyn.
And I seyd if it happe it so thei shuld not longer reste there. And
Mariot stod by and seyd that were no merveyll whill thei were but ij.
men, but it shuld not be best so. And I seyd that I lete them wete it
shuld be so if ye wold, thow they made all the strenght which they coude
make. And ther to Mariot seyd stately, that myght not be performed; and
more langage ther was, to long to wryte at this leyser. Pertrych and his
felaw bere gret visage and kepe gret junkeryes and dyneres, and seyn
that my lord Moleynes hath wrytyn pleynly to hem that he is lord there
and well be, and shall be, and ye not to have it; but I trust to Goddes
ryghtwysenes of better purvyaunce. Lyke it yow to remembre what Heydon
doth and mayde by colour of justice of the pees, beyng of my lordes
councell and not your good frend nor weell wyller, and to comon with
your sad councell what ye must suffre by the lawe, and where inne ye may
resiste. On Sunday last passed Gunore and Mariot and John Davy and other
dyned with Pertrych, &c.; and after eveson [_evensong_] Gonore spake to
my maisteresse that she shuld make here men to leue here wyfeles and
here jackes; and she answered that thei purposed to hurte no man of here
owyn sykyng; but for it was seid that she shuld be plukkyd owt of here
howse, she were loth to suffre that; and therfore she sayde thei shuld
goo soo til ye come hom. And he seid stately, but if thei left here aray
it shuld be plukked from them. I trust he must have a better warant,
from his stately langage, or ells he shall not have it from hem esily.
All this I remitte to your good remembraunce with Goddes help, to Whom I
pray to gyde your ryght to his worshep and your hertes desire.
Wrytyn at Sustede on Seynt Andrewe day, &c.
Yowres,