_To John Paston be this letter delyveryd._
[Sidenote: Not after 1449]
Soon, I grete zow wel with Goddis blyssyng and myn, and I latte zow
wette that my cosyn Cler[108.3] wrytted to me that sche spake with
Schrowpe[108.4] after that he had byen with me at Norwyche, and tolde
her what cher that I had made hym, and he seyde to her he lyked wel by
the cher I made hym.
He had swyche wordys to my cosyn Cler that lesse than ze made hym good
cher, and zaf hym wordys of conforth at London, he wolde no mor speke of
the matyr.
My cosyn Cler thynkyth that it were a foly to forsake hym lesse than ze
knew of on owdyr as good or better; and I have assayde zowr
suster,[108.5] and I fonde her never so wylly to noon as sche is to hym,
zyf it be so that his londe stande cleer.
I sent zow a letter by Brawnton for sylke, and for this matyr befor my
cosyn Cler wrote to me, the qwyche was wrytten on the Wednysday nexzt
aftyr Mydsomer day.
Sir Harry Ynglows is ryzth besy a bowt Schrowpe for one of his dozthers.
I prey zow, for zette nozth to brynge me my mony fro Horwelbery, as ze
com fro London, edyr all or a grete parte. The dew dette was at
Crystemesse last paste, no thynge a lowyd, vij_li._ xiiij_s._ viij_d._,
and at this Mydsomer it is v_li._ more; and thow I a low hym all his
askyng, it is but xxvj_s._ vj_d._ less, but I am nozth so avysyth zytt.
As for the Frer,[109.1] he hath byen at Sent Benetts, and at Norwyche,
and made grete bowste of the sewte that he hath azens me, and bowzthe
many boxes, to what intent I wett never. It is wel doen to be war at
London, in drede gyf he bryng ony syse at Sent Margarets tyme.
I kan no more, but Almyzty God be owr good lorde, who have zow ever in
kepyng. Wryten at Oxnede in grete hast, on the Satyr next aftyr
Mydsomer.
By yowr Modyr,