_To the worschypful Fader yn God, and my ryth gode Lord, the Bysshop of
Wynchestyr.[90.3]_
[Sidenote: 1448 / JUNE 13]
Worschypful Fader yn God, and my rythe gode Lord, as hertely as y canne,
y recomaund me to your gode Lordschyp; to the wyche plese hyt to wyt
that y have resayvyd your lettre, by the wyche y oundyrstond the dayely
sute to your Lordschyp as of Pastun, as for the mater betwyx hym and me,
wer yn also y fele that he ys wyllyd that comynycasyon and trete schold
be had betwyxt hys counsayle and myne, now at Mydsomer; to the wyche, my
Lord, y am at the reverens of your Lordschyp wel agreyd, and have send
to my counsayle at Loundon, aftyr the seyng of thys your last letter,
as for the trete by twyxt hym and me, and that they schold yeve ful
attendauns to the end of the mater by twne the sayde Pastun and me, as
thow y were present with hem.
And, my Lord, hyt were to grete a thyng, and hyte laye yn my power, but
y wold do at the reverens of your Lordschyp, yn las than hyt schold hurt
me to gretly, wyche y wote wel your Lordschyp wol nevyr desyr.
And God for hys mercy have you, rythe worschypful Fadyr yn God, and my
rythe gode Lord, yn hys blessyd kepyng.
Wrytyn with my noune chaunsery hand, yn hast, the xiij. daye of June,
at Teffaunt.
Vere hartely your,