_A nos treshonorés et nobles Signours Visconte Beaumont, Connestable
d’Engleterre et Seigneur de Sudele, grant mestre de hostel de nostre
Souverayn Seigneur le Roy d’Engleterre et France._
[Sidenote: 1447]
Treshonorablez et noblez seigneurs, nous nous recommandons tant que
faire le povons a voz honnorablez seignouriez. Et vous plese savoir que
le samedy xv^me jour du moys de Aprille nous avons receu unez lettrez
patentes de nostre Souverain Seigneur le Roy d’Engleterre et de France,
contenant comme il vous a donné la guarde dez islez de Jersey et
Guernesey durant le non aage de l’er de mon Seigneur de Warwyk, et unez
aultrez lettrez a nous directes de par vous, presentées de par voz
servitours John Morin et Robert Haxby. Et pour cause que eulx n’avoyent
point de procuracions, ou feisions difficultey, et non obstant a voz
ditz servitours a estey delivrée et baillie la pocession de la dicte
isle de Jersey, et ont juré et promis par lours serementz de guarder le
loys et coustumez et anciens usagez de la dicte isle, et nous envoier
lettrez soubz lez seaulx de voz armez, comme voz promettez tenir en
fermete ce que eulx ont promis, et de ce nous ont bailly plege Sire John
Bernard, cappitaine desdictez islez, quer aultrement nous ne lez eussons
point receus, comme il apparest par le certificat a eulx par nous donné,
quer tous lez seigneurs, guardes, cappitaines, juges, et aultrez
officers de audevant de cez hourez ont estey juréz a nous lois,
coustumez et anciens usagez, lez queilz ont estey guardéz et seront en
tempz advenir avecquez l’aide de Dieu, qui vous ayt en sa sainte guarde.
Escript en Jersey le xvij^me jour du moys de Aprill.
De par lez vostrez le Bailiff [et]
Jurés de l’Isle de Gersy.
[Footnote 78.1: [From Paston MSS., B.M.] The custody of the
islands of Jersey and Guernsey, &c., during the minority of Ann,
daughter and heir of Henry de Beauchamp, Duke of Warwick, was
granted in 25 Henry VI. to John, Viscount Beaumont, and Sir
Ralph Butler, Lord Sudley. --_See_ Dugdale’s _Baronage_, ii. 54.]
[[nous nous recommandons
_printed “recommandous” (the doubled “nous” is not an error)_]]
69