_To the worthy and worshipfull Sir and good Lord and Maister, William
Paston, on of the Justices of oure Sovereign Lord, of his Commone Benche
at Westminster._
[Sidenote: Not later than 1444]
Right worthy and worshipfull Sir, and my good Lord and Maister,
I recomaund me to yow. And where as ye, by your lettre direct to my
Lady, your wyf, wold that my seid Lady shuld have Robert Tebald and me
to geder, as sone as she myght, and the evidences which the seid Robert
receyved of yow at your last beyng at Norwich, and that I shuld amende
the defautes therinne, and that that doon there shuld of Baxteres Place
of Honyng be taken estate to yow and to other, as your seid lettre
requireth: Prey and beseche yow to witte that, on the Friday next after
your departyng fro Paston, Thomas Walysh and William Burgh, in his owen
persone, and the seid Thomas by William Inges and William Walsyngham,
his attornies, by his lettre under his seal, where [_were_] at Honyng,
and delyvred to my Lady Scarlet seson [_seisin_] in the seid place, and
Colbyes and Donnynges in Walsham. And the seid Thomas Walyssh, as the
seid Tebald told me, wold not enseale the seid lettre of attornie til
the parson of Ingeworth come to hym therfore, and required hym to don
it. Wychyngham in his owen persone in the nyght next beforn the seid
Friday, as the seid Tebald infourmeth me, come to the same Tebaldes
hows, and desired hym to enseale acquytaunce, as he seid, and the same
Robert refused to don it.
Nertheless, whether it were acquytaunce or were not, the same Robert kan
not seye, for he myght noo sight have there of. And the seid Wychyngham
the same nyght rood to John Willyot, and desired of hym the same, and
refused also to don it. What is the best to be don in this matier my
seid Lady, your wyf, kan not thynke with owt your advis and counseile.
Wherfore as touchyng the takyng of th’estate to yow and other, as in
your seid lettre is conteigned, is yet right nought doon.
The Holy Trinite have yow in his blissed kepyng. Wretyn at North
Walsham, the Thursday next after the Purificacion of oure Lady.
My seid Lady, your wyf, preyeth yow to be remembred of here grene gynger
of almondes for Lente, and of the leche of Orwelde, for here seknes
encreseth dayly upon here, whereof she is sore a ferd.
By youre servunt,