_A mon tresreverent et treshonerable Maister John Paston soit doné._
[Sidenote: 1440 / NOV. 1]
Salvete, &c. Tytyngs, the Duk of Orlyawnce[46.3] hath made his oath upon
the Sacrement, and usyd it, never for to bere armes ayenst Englond,
in the presence of the Kyng and all the Lordes, except my Lord of
Gloucestre.[46.4] And proving my seyde Lord of Gloucestre agreyd never
to hys delyveraunce, qwan the masse began he toke his barge, &c.
God yef grace the seide Lord of Orlyaunce be trewe, for this same weke
shall he to ward Fraunce.
Also Freynchmen and Pykardes, a gret nowmbre, kome to Arfleet,[47.1] for
to arescuyd [_have rescued_] it; and our Lordes wyth here smal pusaunce
manly bytte [_beat_] them, and pytte hem to flyte, and, blyssyd be our
Lord, have take the seide cite of Arflet; the qwych is a great juell to
all Englond, and in especiall to our cuntre.
Moreover there is j. [_i.e._ one] kome in to Englond, a Knyght out of
Spayne, wyth a kercheff of plesaunce i wrapped aboute hys arme; the
qwych Knyght wyl renne a cours wyth a sharpe spere for his sovereyn lady
sake; qwom other [_either_] Sir Richard Wodvyle[47.2] or Sir Christofore
Talbot[47.3] shall delyver, to the wyrchip of Englond and of hem selff,
be Goddes grace.
Ferthermore, ye be remembryd that an esquyer of Suffolk, callyd John
Lyston, recoveryd _in assisa novæ disseisinæ_[47.4] vij^c [700] marc in
damages ayenst Sir Robert Wyngfeld, &c. In avoydyng of the payement of
the seid vij. c. marc, the seide Sir Robert Wyngfeld sotylly hath
outlaywed the seide John Lyston in Notyngham shir, be the vertue of qwch
outlagare, all maner of chattell to the seide John Lyston apperteynyng,
arn acruwyd on to the Kyng, &c. And anon as the seide utlagare was
certyfyed, my Lord Tresorer[47.5] graunted the seid vij. c. marc to my
Lord of Norffolk, for the arrerag of hys sowde [_pay_] qwyl he was in
Scotland; and, acordyng to this assignement forseide, taylles
[_tallies_] delyvered. And my Lord of Norffolk hath relesyd the same
vij. c. marc to Sir Robert Wyngfeld. And here is greet hevyng an shovyng
be my Lord of Suffolk and all his counsell for to aspye hough this mater
kam aboute, &c.
Sir, I beseche recomende me on to my mastres your modyr, to my mastres
your wyff, and to my mastres your suster, _et omnibus alijs quorum
interest_, &c.
Sir, I pray you, wyth all myn hert, hold me excusyd that I wryte thus
homly and briefly on to you, for truly convenable space suffycyd me
nowt.
No more atte this tyme, butte the Trynyte have you in proteccion, &c.;
and qwan your leysyr is, resorte ageyn on to your college, the Inner
Temple, for ther ben many qwych sor desyr your presence, Welles and
othyr, &c.
Wretyn in le fest de touts Seynts, entre Messe et Mateyns, _calamo
festinante_, &c.
Yours,