_To my ryght noble and ryght [dra]dde lord, my Lord Beaumont._
[Sidenote: 1432-40]
Ryght wursshipfull sire, my ryghte noble, and ryghte dradde lorde, after
dyw recommendacion to yowr reverens, please hit yow to know that yowr
lordesship luste to empointe me to abyde yowr noble avys touching the
landis of Latemer, which my Lorde Latemer holdith ate this day. My lord,
I muste, and owe of dywte, abyde yowre empoyntement, and shall; how be
hit I have be confortid to complaine me to my lordis and yow of the
grete wronge that I have. But, sir, y have soe verray truste one yowre
lordesship that I refuse all counsaille, abyding yowre empointemente and
rewell, as my diwte is to doo; byseching yow, my lord, to remembre yow
and compasse of yowre servaunt, and that ye lust of yowr grace to comyne
with my Lord of Salisbury, and to fele him in the mater, and as ye fele
him, hit please yowre lordesship I may have knowlege; and whate yowre
pore bedman may do to yowre plesire, I ame redy ate yowre comaundement
ate all howris, which knowith God, Hoe have yow, my ryghte noble lord,
in His blessid gouvernauns.
Write ate Broke, the v. day of Marche.
Your pore bedman and servant,