[Sidenote: 1430(?)]
My ryghte worthy and worshopeful lord, I recomaunde me to yow. And for
as meche [as I] conseyve verrayly that ye arn Vicar general in Inggelond
of the worthy Prelate, the Abbot of Clunie, and have hys power in many
grete articles, and mong other in profession of monkes in Inggelond of
the seyd ordere. And in my cuntre, but a myle fro the place where I was
born, is the poure hous of Bromholm of the same ordre, in wheche arn
divers vertuous yongge men, monkes clad and unprofessyd, that have
abedyn there. . . . Abbyte ix. or x. yeer; and be lenger delaye of here
profession, many inconvenientez arne lyke to falle. And also the priour
of . . . hath resigned in to your worthy handes by certeins notables and
resonables causes, as it apperyth by an instrument, and a symple lettre
under the comune seal of the seyd hous of Bromholm, which the berare of
this hath redy to shewe yow, wher up on I prey yow wyt al my herte, and
as I evere may do yow service, that it lyke to your grace to graunte of
your charite, by yowr worthy lettres to the priour of Thetford in
Norfolk, of the seyde ordre of Clunye, autorite and power as your
ministre and depute to professe in dwe forme the seyd monkes of Bromholm
unprofessed. And that it lyke yow evermore to accepte and admitte the
seyd resygnacion by your seyd autoritie and power, wyth the favour of
your good lordshepe in comfort and consolacion of your pouere prestes,
the monkes of the seyd hous of Bromholm, and there up to graunte your
worthy lettres, wittenessyng the same acceptacion and admyssion of the
seyd resignacion, and al your seyd lettres to delyvere to my clerke, to
wham I prey yow to gyve feith and credence touchant this matier, and to
delivere it hym in alle the hast resonable. And I am your man, and evere
will be by the grace of God, which evere have yow in his kepyng. Writen
at Norwich the [33.1] of Aprill.
Yowres,