[A] Then ruþes hym þe renk, & ryses to þe masse,
& siþen hor diner wat3 dy3t & derely serued. [Fol. 112.]
1560 [B] Þe lede with þe ladye3 layked alle day,
Bot þe lorde ouer þe londe3 launced ful ofte,
Swe3 his vncely swyn, þat swynge3 bi þe bonkke3,
[C] & bote þe best of his brache3 þe bakke3 in sunder;
1564 Þer he bode in his bay, tel[1] bawe-men hit breken,
& made[2] hym, maw-gref his bed, forto mwe vtter;
[D] So felle flone3 per flete, when þe folk gedered;
Bot 3et þe styffest to start bi stounde3 he made,
1568 Til at þe last he wat3 so mat, he my3t no more renne,
[E] Bot in þe hast þat he my3t, he to a hole wynne3,
Of a rasse, bi a rokk, þer renne3 þe boerne,
He gete þe bonk at his bak, bigyne3 to scrape,
1572 [F] Þe froþe femed[3] at his mouth vnfayre bi þe wyke3,
Whette3 his whyte tusche3; with hym þen irked
Alle þe burne3 so bolde, þat hym by stoden,
[G] To nye hym on-ferum, bot ne3e hym non durst
1576 for woþe;
He hade hurt so mony byforne,
Þat al þu3t[4] þenne ful loþe,
[H] Be more wyth his tusche3 torne,
1580 Þat breme wat3 [&] brayn-wod bothe.
[Sidenote A: Gawayne rises, hears mass, and then dines.]
[Sidenote B: Meanwhile the lord pursues the wild boar,]
[Sidenote C: that bit the backs of his hounds asunder,]
[Sidenote D: and caused the stiffest of the hunters to start.]
[Sidenote E: The boar runs into a hole in a rock by the side of a brook.]
[Sidenote F: The froth foams at his mouth.]
[Sidenote G: None durst approach him,]
[Sidenote H: so many had he torn with his tusks.]
[Footnote 1: til (?).]
[Footnote 2: madee, in MS.]
[Footnote 3: fomed (?).]
[Footnote 4: þo3t (?).]