Ir bischov' unde ir edeln pfaffen, ir sît verleitet.
seht wie iuch der bâbest mit des tievels stricken seitet!
saget ir uns, daz er sant Pêters slüzzel habe,
sô saget, war umbe er sîne lêre von den buochen schabe?
daz man gotes gâbe iht koufe oder verkoufe,
daz wart uns verboten bî der toufe.
nû lêre êt'z in sîn swarzez buoch, daz ime der hellemôr
hât gegeben, und ûz im lese êt sîniu rôr.
ir kardenæle, ir decket iuwern kôr:
unser alter frône der stêt undr einer übelen troufe.