Ez gienc, eins tages als unser hêrre wart geborn
von einer maget, die'r im ze muoter hâte erkorn,
ze Megedeburc der künec Philippes schône.
dâ gienc eins keisers bruoder unde eins keisers kint
in éiner wât, swie doch der namen drîe sint:
er truoc des rîches zepter und die krône.
er trat vil lîse, im was niht gâch,
im sleich ein hôchgeborniu küniginne nâch,
rôs' âne dorn, ein tûbe sunder gallen.
diu zuht was niener anderswâ:
die Düringe und die Sahsen dienden alsô dâ,
daz ez den wîsen muoste wol gevallen.