1 Tis al verkeert dat plach te sijn:
ghenoecht, solaes, mijns herten vreucht.
dat heeft ghedaen haer scheidens pijn.
god wilse bewaren die suver jeucht!
herte ende sin is onverheucht:
god heeft mijn liefste boel ghehaelt.
al is den wijn claer int aenschijn,
in mijn herte is hi verschaelt.
2 Die nachtegale ende die leuwerken,
die bloemkens die aen der heiden staen,
trompen, luten ende harpen
en moghen van mi gheen vreucht ontfaen,
dat scheiden hevet mi al ghedaen.
ic ben een haveloos ruiterken,
in Venus prisoen ben ic ghevaen:
dus moet ic truren al tleven mijn.
3 Rijc god, ic ben mijns levens moe,
int herte lide ic heimelijc doghen,
eet ic, drinc ic, wat ic doe,
dat is met twee beweende oghen.
hoe soude ic connen vreucht betoghen?
god heeft benomen mijn liefste ghenoot.
die liefde had ic so diepe ghesoghen,
tis mi rouwe tot in mijn doot.
4 Tvergaderen en was noit so soet,
het scheiden en is veel meerder pijn.
die niet en weten minen noot,
hoe souden si kennen dat herte mijn?
want hier te sijn is cort termijn:
al ligghen wi hier in blanken armen,
ten einde moet al ghescheiden sijn.
god wil haer lieve siele ontfermen!
5 Och rijc heer god, en waert gheen sonde,
over u riepe ic veel meer dan moort.
ghi hebt mijn liefste lief ghevonden,
weest doch haerder armer sielen confoort,
ghenadich god, ic bidde u voort.
om haren wille mijn herte sneeft,
op rechter minne was ic ghestoort,
ic bidde u dat ghijt mi vergheeft.
6 Mi heeft ghedroomt so menighen droom:
dat niet en is dat mach noch sijn.
al in die stat van Room
daer leit begraven die liefste mijn
op godsacker, alst is aenschijn.
daer droeghense die ruiters van der banc.
ic schencte hem lieden den coelen wijn,
si wistens mi also groten danc.
Antw. LB. 1544. Nr. 148.--Dr. 3, 7. die liefste--4, 4. soude hi
(souden si).
¶ 1, 2. ghenoecht, Vergnügen--1, 5. onverheucht, ohne Freude--1,
8. verschaelt, schal geworden--2, 3. trompe, Trompete (jetzt
Maultrommel u. Jagdhorn)--2, 6. haveloos, arm, jetzt schmutzig,
vgl. Huyd. proeve 1, 17.--3, 2. doghen, Leiden--3, 5. betoghen, zeigen,
an den Tag legen--3, 6. ghenoot, Genossin--4, 1. het vergaderen,
das Beisammensein--7, 4. confoort, Trost--5, 6. sneven, vergehen--6,
5. aenschijn, offenbar--6, 6. ruiters van der banc, Kriegsgenossen,
Kameraden, banke, der Tisch, daher bancbroeders, bancghesellen,
die mit einem an Einem Tische sitzen, mit einem essen und trinken.
¶ Nr. 118.