1 Het voer een vischer vischen
so verre aen ghenen Rijn,
hi en vant daer niet te vischen
dan een hupsch maechdelijn.
2 'Och vischer, seide si, vischer!
waer toe draecht ghi uwen moet?'
'al totter hupscher deerne,
dat dunct mi wesen goet.'
3 'Och vischer, seit si, vischer!
dat visch hebt ghi ghevaen,
so verre aen gheen groen heide
daer is goet vischen gaen.'
4 'Aen gheender groender heide
daer leit dien couden snee,
daer vriesen mi handen ende voeten,
mijn hooft doet mi so wee.'
5 'Vriesen u handen ende voeten,
doet u uw hooft so wee,
so gaet al in der stoven,
daer en vrieset u nemmermeer.'
6 Mer doen die lose vischer
al in der stoven quam,
doen bestont hi haer te vraghen
nae haren ghetrouden man.
7 'Wat hebt ghi mi te vraghen
nae minen ghetrouden man?
mijn man is al in der kerken,
hi bidt gods heilighen an.'
8 'Is uw man al in der kerken
oft in den coelen wijn,
so laet ons eten ende drinken
ende laet ons vrolijc sijn!'
9 Mer doen si saten ende aten,
doen quam haer eighen man,
doen docht die lose vischer:
hoe come ic nu van dan?
10 Dat vrouken was behendich,
si goot haer vischsop uit,
doen spranc die lose vischer
ter hoochster veinsteren uit.
Antw. LB. 1544. Nr. 71. (Uhland Nr. 283. B. Willems Nr. 115.) Dr. 2,
2. dracht--3, 2. wat visch--3, 4. ist--5, 2 und 4 fehlt u.
Gleiches Inhalts das niederd. Lied bei Uhland Nr. 283. A.
¶ 4, 3. vriesen, frieren--6, 2. stove, frz. étuve, Stube, heizbares
Zimmer, s. Weigand Synom. Nr. 1830--6, 3. bestaen, beginnen--10,
2. vischsop, Fischbrühe.
¶ Nr. 53.