Ona volta gh'era on Prenzip. L'era vedov; el gh'aveva minga de miee,
l'era morta. E el gh'aveva ona tosa; e in casa soa, la sera, gh'era
semper conversazion. De quij, che andava là alla conversazion, gh'era
on cont; e el ghe fava l'amor alla tosa de sto Prenzip. Quand el
pader è vegnuu a savell, el gh'ha proibii alla soa tosa de parlagh;
ma lee, de scondon, la ghe parlava semper. Ven, che lu, sto cont,
l'ha ditt:—«Mi vòo a cercalla al pader.»—E el pader, el gh'ha ditt,
ch'el voreva minga maridalla, che l'era tropp giovina, e de lassalla
sta. Ma lee, la ghe voreva tant ben e lu l'istess, che han combinàa
de sposass secretament. E lì han cercàa on pret e di testimoni; e ona
sera, de nascost del pader, hin andàa e s'hin sposàa. Ven, che lee, è
vegnuu on moment, che bisognava, che al pader ghe le disess, che lee,
l'era maridada. Quand ghe le dis al pader, lu, el va in tutt i furi; e
el ghe dis, che l'è minga vera e ch'el ghe cred minga. E la ghe dis,
che gh'è el pret e i testimoni. E lu, a la sera, l'ha fàa su tutta
la robba de la tosa; de scondon l'ha fàa taccà sott; l'ha missa in
carrozza; e l'ha menada distant, che lee l'ha minga podùu capì in che
sit, ch'hin reussìi. Fatt l'è, che l'era de nott: el pader, el va a on
convent, el ghe dis:—«Quest l'è el sit, in dove te devet stà ti.»—El
parla cont la badessa, e el ghe dis la manera, che doveven regolass;
e pœu el va via, el lassa lì la soa tosa. Lee, la se trœuva in de sto
monastee. E i monegh ghe disen, che la doveva fà l'ann de novizziàa e
dopo fass monega. Lee, la dis che la podeva minga.[ii] Difatti, de
lì on trì mes, la gh'ha avuu ona tosetta. Lor, sta tosetta, i monegh,
per part de la mièe del giardinèe l'han dada via a bailì. E pœu, lee,
in seguet, voreven a tutt i cunt, che la se fass monega. E lee, la ghe
diseva, che la podeva minga: che, se lee la se fava monega, la fava on
sacrilegg, perchè l'era maridada. So pader, el mandava là a vedè sta
soa tosa come la se comportava. Lor ghe diseven, che la voreva minga
fass monega; e lu, el ghe diseva a i monegh, de dagh di gran castigh.
Ven, che i monegh l'han ciappada, l'han menada giò in d'on sotterani.
E là, no la gh'aveva nient, on lettin propi come in terra, a dormì a
l'umed: per vedè, se lee l'avess avùu de podè fa la monega. Ma lee,
l'è semper stada ferma. La ghe diseva:—«Putost la mort, che fà on
sacrilegg.»—Quella, che andava de bass a portagh el mangià, l'era ona
moneghella, che anca lee l'han missa denter, contra la soa volontàa.
E quand l'andava de bass a portagh el mangià, le confortava; e la ghe
diseva semper de sperà in dio, che l'avaria juttada. Ven, che quella
tosetta, che aveven fa bailì, era già passàa on ses o sett ann, e
l'han tirada lì in del convent; e i monegh l'educaven lor, ma semper
con l'idea, che la dovess fa la monega. Ma sta tosa la gh'aveva poca
vocazion. È passàa on poo de temp e la gh'aveva già on quindes ann.
Lee, l'andava cont i monegh al mattutin tutt i ser; e passaven via d'on
corridor e la sentiva di volt ona vôs, on lament, che a sta tosa el ghe
fava penna. La ghe le dis, a quella tal moneghella, che l'era lee, che
gh'aveva i ciav e che andava giò. La moneghella, lee le dis, che l'era
ona povera infelice, che l'era in castigh. Lee, la gh'ha ditt, che la
desiderava de vedella, sta povera infelice, per podè confortalla. E la
monega, la dis:—«Ben, sent. Diman de sira, quand tutti hin a dormì,
mi te menaroo de bass; ma guarda ben a confidaghel a nissun; se de
no, mi voo in bordell[iii].»—Lee, la ghe dis:—«No, no; sta certa, che
mi no ghel diroo a nissun.»—La sera adree, quand tutti hin a dormì,
che gh'è quiett depertutt, van e derven st'us'c sott a sto coridor e
van giò. Sta tosa, la dis:—«O che aria umeda, che ven! povera donna!
come la dev avè soffert!»—Van là; e sta donna, la dis:—«Chi l'è, che
ven de sti or in de sta povera infelice?»—E la monega le dis:—«Sont
mi, che te meni giò ona novizia, che la desidera de vedett.»—E lee,
la ghe dis:—«O brava! vedi volentera, che te l'abbiet menada chì.»—La
ghe dimanda a sta giovina, se la voreva propi fa la monega; e lee, la
ghe dis: se le fava, le fava per forza; perchè lee, la gh'aveva minga
la vocazion de fa la monega. E sta donna, la malada, la ghe dimanda
quanto temp l'è, che l'è denter; e lee, la ghe rispond, che dopo che
l'è vegnuda granda, l'è stada semper denter lì. La ghe dimanda, quanti
ann la gh'ha; e la tosa, la ghe dis, che la gh'ha quindes ann. E lee,
allora, la ghe dis:—«Allora te see nassuda chì denter!»—e la se volta
con la monega e la ghe dis:—«Dimm la veritàa, che questa l'è la mia
tosa?»—Allora la monega, la dis:—«Si, mi hoo mai vorùu dì nient per
no inquietàtt, ma questa l'è la toa tosa.»—Allora la tosa, la ghe trà
i bracc al coll a soa mader e la ghe dis:—«Subet che mi sont la toa
tosa e mi saroo quella, che te salvaràa de chì.»—E s' ciavo e van via.
La monega, la dis:—«Per caritàa, digh nient a la badessa; fa minga in
manera, che mì gh'abbia andà de mezz.»—E lee, la ghe dis:—«No, sta
sira l'è tropp tard; ma diman, quand saran tutti a dormì e quiett, mi
e ti emm de sortì del convent. Ti, te see pratica de sta cittàa chì;
e andarem tutt e dò de l'arcivescov. E quand sarem là, lassem parlà
de mi.»—Adess bœugna tornà del marì. Combinazion, ch'el marì l'ha mai
podùu savè, in dove l'avess compagnàa soa miee so pader de lee. E lu,
l'andava semper de sira de spess in de sto arcivescov in conversazion;
el ghe diseva tutt i so dispiasè, ch'el gh'aveva: e lu, l'arcivescov,
el ghe diseva de sperà, che chi sà che on quaj dì o l'alter l'avess
avuu de podè trovà ancamò la soa mièe? Ven, che quella sira l'era là in
conversazion, quand va denter on servitor. El ghe dis:—«Soa Eminenza,
gh'è chì dò monegh; han de bisogn de parlagh.»—Allora l'arcivescov, el
và là, el ghe dis:—«Come! dò monegh de sti or fœura del monestee?»—E
lee, allora, la tosa, la ghe dis:—«Si, el bisogn, el m'ha faa sortì
anca de sti or chì!»—e la ghe cunta i maltrattament, che ghe faven
a la soa mamma, che han mai voruu cred, che la fuss maridada.—«E mi
sont vegnuda a savè, che mi sont la soa tosa; e vegni a interced grazî
per la mia mamma»—Allora lu, el dis:—«Ben, diman vegnaroo subet al
convent; faròo finta de andà a vedè tutt i local.»—El ghe dis a quella
monega:—«Ti, che te gh'hét i ciav de tutt, quand semm sott a quel
portegh, damm ona oggiada, che mi allora voreroo vedè anca quel sit
là.»—S'ciao, ie fa compagnà a casa col servitor; e lor van a casa e
van in la soa cella e van a dormì. El dì adree, ghe va l'arcivescov.
E la mader badessa, la corr, ma la corr a la contra! la ghe fa cera e
la ghe dis:—«Che novitàa de vegnì, che nun l'aspettavem minga?»—E lu,
el ghe dis, che l'era andàa per fa ona visita al convent. La mader
badessa le mena attorno deppertutt; e quand l'è sott a quel portegh, la
monega la ghe fa on segn. E lu, el dis:—«Ma sto uss chì, dove l'è, che
el va?»—E lee, la Badessa, la ghe dis:—«Oh l'è on uss d'ona cantinna;
l'è minga on uss.... non se va mai giò.»—E lu, el dis:«—Ben, posto che
visiti tutt, vœuj visità anca sto sit.»—La badessa l'è restada lì e la
po minga digh de no; e lee, la monega, la pessèga, la derv. Ven giò
l'arcivescov: el resta lì a vedè sta povera infelice lì buttada giò
in su on pajassin. El ghe dis:—«Che delitt l'ha commess sta donna de
maltrattalla in sta manera?»—E lee, la ghe dis, lee, la malada, che la
maltratten in quella manera lì, perchè lee l'è maridada e lor voreven,
che la professass a fà la monega. Allora lu, l'arcivescov, el ghe da
ordin immediatamente de levà quella donna de quel sit lì, de portalla
de fœura e mettella in su on lett e de dagh quaicoss de podè tiralla
su, perchè l'era tanto svenuda, gh'era vegnùu fastidi. El fava stà lì
la soa tosa e quell'altra monega. L'è stada lì per on poo de dì; e pœu
l'arcivescov l'ha mandada a tœu, lee e la tosa e la monega insemma
tutt e tre, l'ha missa in d'ona casa fina, che l'ha podùu recuperà on
poo de salut. On dì va là el cont, el torna a parlà di so dispiasè:
allora l'arcivescov, el fa taccà sott, el ghe dis:—«Andem, che vœuj
menav in d'on sit a fa ona visita.»—E le mena là, dove gh'era la soa
mièe:—«Ecco»—el dis—«la cognossìi questa chì?»—E lu, el dis:—«Mi
no.»—«Ben, questa l'è la vostra mièe e questa l'è la vostra tosa.»—E
lu, l'è restàa ben content d'avè trovàa la mièe e la tosa. L'arcivescov
l'ha dàa on gran castigh a la badessa e pœu l'ha mandàa a ciamà so
pader de lee. Anca a lu, el gh'ha dàa ona gran strapazzada[iv]. E
quella monega che gh'era insemma, che l'ha salvada, l'è restada anca
lee cont lor, perchè lee, la monega la fava contra la soa volontàa. Hin
restàa insemma e s'ciavo, n'occorr alter.
[i] Il LIEBRECHT annota:—«KLOSTERGESCHICHTE. Nichts besonderes.»—Ma
ognun vede quanto importa questa novella, come documento di ciò,
che ribolliva nelle menti de' volghi.
[ii] Un frammento di canzonetta popolare, raccolta a Crenna, nel
quale il processo di dialettizzamento è rimasto incompiuto, dice:
_In stassira e l'altra sira Son passada del monistee, E hoo
incontrà d'ona giovina bella, Che l'andava monighella. La s'è
voltada de penseo, E el so fradello caro Gh'ha donato d'on bel
libretto. —«Mi non voglio questo libretto: Ma mi voglio quel
giovinetto, Che me consolarà.»— L'han ciappada per ona man, L'han
menada in d'ona stanza scura, E pœu sì l'han fada morì. —«Adesso,
che tu sei morta, Te farem di gran onor. Farem cantà di offizii E
altretanti sonador.»—_
[iii] _Andà in bordell_ andare a rovina.
[iv] _Strapazzada_, rabbuffo.
[5] _Padrino._ Ricorda e spiega il _parrinu_ Calabro e siculo, che
val prete.—BEBEL. _Facetiarum Liber I_.—«Vidimus nuper Eremitam
promissa barba insignem, qui, cum multa esanctimoniae ab aliquibus
praedicaretur, surrexit unus ex nostris, qui parvam existimationem
tribuebat universis illis eremitis, dicens: _Unde sanctitatem
auguramini, an ex promissa barba? Non est sie, ô simplices
sodales: si enim barba probitatem adderet, hircus esset vel omnium
probissimus_.[i]»—
[i] Ricordo confuso un epigramma, in cui c'è lo stesso pensiero, ma
si parla di filosofi e termina: _quid vetat, caper esse Plato_.
[6] _Sic._
[7] Questo negozio, questo baratto svantaggioso, ricorda l'esordio
del Trattenimento V della Giornata III del _Pentamerone_:—«Nardiello
è mannato tre bote da lo patre a fare mercanzia co' ciento docate la
vota; e, tutte le bote, accatta mo' 'no sorece, mo' 'no scarrafone
e mo' 'no grillo. E, cacciato pe' chesto da lo patre, arriva dove,
sananno pe' miezo de' st'anemale la figlia de 'no Re, dapò varie
socciesse le doventa marito.»—