{44}
Frutex uti videtur; ramis teretibus digitum minimum crassis, cortice
cinereo-fusco, rugoso-lacunoso. Folia opposita; plerumque inaequalia,
altero ramum subtendente ut plurimum duplo triplove minore; ovata v.
ovato-oblonga, obtusiuscula v. obtusissima; ramea 6 pollices longa, 2
pollices lata, ramulorum abbreviata, 3-3½pollicum longitudine, 2-3
pollicum latitudine; omnia integerrima glabra, subtus pallidiora,
nervo centrali valido, secundariis alternis oppositisque tenerrimis,
prope marginem combinatis, nonnulla basi saepius plus minusve
inaequilatera v. breviter in petiolum decurrentia. Petioli 9-15
lineas longi, teretiusculi, transversim rugulosi, post lapsum
cicatrices ovatas relinquentes. Cymae in ramulis terminales,
primariae trichotomae, laxiusculae, pedunculis pedicellisque vix
lineam longis, caduce bracteatis, teretiusculis. Flores 3-4 lineas
longi. Perigonium infundibuliformi-campanulatum; tubo basi angustato
tereti, medio subinflato angulato, apicem versus sensim expanso,
limbo breviter quinquelobo, plicato, lobis ovatis acutiusculis
crenulatis, uno alterove saepius emarginato. Stamina 8 hypogyna,
filamentis basi brevissime monadelphis filiformibus, quatuor
majoribus inter se aequalibus, quatuor minoribus inaequilongis,
omnibus perigonii limbum subaequantibus v. subsuperantibus. Antherae
ovatae biloculares, basifixae; loculis suboppositis basi discretis.
Ovarium brevissime stipitatum, oblongum, stylo filiformi sublaterali;
stigmate oblique subcapitato spongioso. Perigonium fructiferum
pollicem longum induratum crassiusculum, apice nonnihil incrassato
subclavatum, limbo marcido constricto faucem claudente coronatum,
juxta totam longitudinem angulatum, angulis papillis minimis humorem
viscidum secernentibus exasperatum Utriculus membranaceus, staminum
exuviis stipatus, stylo persistente superatus. Semen erectum
oblongum, 7-8 lineas longum. Testa membranacea tenuis. Embryo semini
conformis, cotyledonibus foliaceis appressis, longitudinaliter
albumen farinaceum amplectentibus, altera interiore septima v. octava
parte breviore, radiculam conicam obtusiusculam inferam quadruplo
superante.