Radices copiosae filiformes rigidae ramosae elongatae, intricatae.
Pseudobulbi plurimi dense consociati ovati, nucis avellanae mole,
subulati v. oblongi, ½-1 pollicem longi, apice vestigiis foliorum
delapsorum laxiuscule annulati, profunde longitudinaliter sulcati,
vernicoso-citrini, purpureo marginati, basi vaginis annotinis
filamentosis irregulariter ruptis tunicati. Folia tria vel quatuor
approximatim alterna incumbentia, elliptica obtusa v. retusa, basi
sese invicem amplectentia, patentia v. subreflexa, coriacea,
longitudinaliter subtilissime confertim striata, 2¼ poll. longa, 7
lineas lata, intima saepe triplo breviora, dimidioque angustiora.
Inter folia oritur cauliculus sesquipollicaris, plerumque aphyllus,
rarius foliis 2-3alternis, 5-6 lineas dissitis, ellipticis, obtusis,
amplexicaulibus, 2-3 lineas longis, floribus tunc plerumque
abortivis. In caulibus floriferis foliorum loco bracteae ovatae,
obtusae, coriaceae, 1½ lineam longae, 3-4 lineas remotae, singulae
pedunculum teretiusculum, 5-6 lineas longum foventes, pedunculis
florum inferiorum longioribus, ita ut inflorescentia corymbum
tri-quadriflorum referat. Flores luteo-virides, semipollicem longi,
alabastris tereti-cylindricis. Ovarium oblongo-subclavatum,
sexsulcum. Sepala oblonga obtusiuscula, basi paullulum angustiora,
obsolete trinervia, semipatentia, apice subinflexa. Petala sepalis
conformia, vix quidquam breviora, dimidio angustiora, cum labello
penitus conformi subconniventia. Columna brevissima crassiuscula
teres, limbo bilabiato; labio inferiore sextante breviore, ovato,
acutissimo, erecto; superiori trilobo, lobis lateralibus acutis,
latere antico denticulo brevissimo auctis, introrsum conniventibus,
intermedio latiori emarginato, sinu antheram cordiformem ope
filamentuli brevissimi affixam gerente. Anthera terminalis
opercularis, bilocularis, loculis septulo incompleto bilocellatis.
Pollinia in quovis loculo 2, collateralia, oblongo-subclavata, basi
subcohaerentia. Stigma centrale sessile. Proscollam non vidi.
74. THELYCHITON MACROPUS, caulibus caespitosis cylindricis apice
foliosis, racemo terminali subcorymboso paucifloro folia aequante.
_Ferd. Bauer Illustr. pl. Norfolk. t._ 174.