Frons sesquipedalis 3partita membranacea glaberrima. Stipes pennae
corvinae crassitie, antice sulcatus, dorso convexiusculus,
glaberrimus, laevis, fusco-sanguineus nitidus. Rami pinnati,
laterales divaricato-patentes. Pinnae approximatim alternae, paribus
1½-2 pollices dissitis, 4-5 pollicares, usque ad costam pinnatifidae.
Laciniae oblongo-lineares, erecto-patentes obtusae, 9 lineas longae,
3 lineas latae; alternae, discretae, infimae basi subpinnatifidae,
omnes argute serrulatae. Nervus laciniarum subtus vix prominulus,
venulas alternas supra medium 2furcas exserens. Indusia membranacea,
interrupta, saepius unilateralia.