Permeo terras, ubi nuda rupes
Saxeas miscet nebulis ruinas,
Torva ubi rident steriles coloni
Rura labores.
Pervagor gentes, hominum ferorum
Vita ubi nullo decorata cultu
Squallet informis, tugurique fumis
Foeda latescit.
Inter erroris salebrosa longi,
Inter ignotae strepitus loquelae,
Quot modis mecum, quid agat, requiro,
Thralia dulcis
Seu viri curas pia nupta mulcet,
Seu fovet mater sobolem benigna.
Sive cum libris novitate pascet
Sedula mentem;
Sit memor nostri, fideique merces,
Stet fides constans, meritoque blandum
Thraliae discant resonare nomen
Littora Skiae.
Scriptum in Skia, Sept. 6, 1773.