Im folgenden drucke ich ein als Einblattdruck verbreitetes
Scherz-Recept des beginnenden 16. Jahrhunderts ab, welches in einen
Sammelband des Hieronymus Coler (Germ. Mus. Hs. 2908) als fol. 5
eingeklebt ist[186]. Zwar mag die ganze Tonart und der Humor, in dem
das Stück gehalten ist, für den Kenner der Zeit nichts Neues bieten,
jedoch wird es sich zu Vergleichszwecken hier und da mit Nutzen
heranziehen lassen.
Ein Edel vñ köstlich, von vilen ein bewert Recep | wider die Faulkeyt
vnd Klappersucht der Weyber vnd Magt. Ausz Esculapio | Podalirio
| Galieno | Hipocrate | vnd Mesue | auch vil andern beruͤmbten
Doctoribus erlesen. Durch den wirdigen vnd hochgelerten herrn Doctor
Nemo | ergruͤndet | vnd zuͦsamen getragen etc.
~Die new Salb~
So ein Person obgemelt kranckheit anstiesz | oder lang zeyt damit
behafft were gwesen.
Recipe: Scheyter Kraut, Gerten Salat, Bengel Suppen, Bruͤgel
Bruͤlein, Stecken Pfeffer, Kolben gemuͤsz, Gabel Galrey, Tremmel
Proten, Plewel Fladen, Schlegel Kuͦchen, Fuͦsz Milch, Pastetlein
gebachen von Besemstiln, Krefftige Fausttaͤflein. Yedes ein halb
vierteyl einer stundt. Fiat Vnctio.
Obgemelte ärtzney | eins nach dem andern | lege der krancken person
vber den kopff | Lenden | Arm | vnd Schenckel | schmirs auch darmit
bisz das jr der roth vn̄ plaw Schweysz kumpt | dan̄ wisch das mit fünff
fingerkraut ab.
Man sol auch obgemelte stuͤck | alle so sie vor wol gebeet | mit nach
gemeltem Puluer vbersehen | darmit sie dester krefftiger seyen.
Recipe: Leyden, Marter, Wunden, Kranckheyt. Puluer yedes ein halben
Landszknecht[187]. Fiat puluis | et condiantur antecedentia.
Pillulen auch | zuͦ purgieren | von nachgemalten stücken seind nicht
vnnütz.
Recipe: Fuͤsz pillulen, Feust teyg, Knew latwerg, Electuarium von
Ellenpogen stossen. Yedes XII stoͤsz. Fiant Pillul. et dentur ad
placitum.
Darneben auch mit Syrop zuͦ purgieren, magst du nach hernante stuck
brauchen.
Recipe: Geyselstaͤb, Sesselbeyn, Kunckelzucker, Kerwisch stil. Yedes
ein pfundt. Fiat Potio detur in aurora Vesperique.
Du solt vnderweylen der krancken person | fuͤr labung geben | vber
die seyten | oder wo dich zuͦm besten bedunckt | wie volgt.
Recipe: Teller pyren. Fiat Electuarium et detur ad refectionem.
Darmit vnnd aber | die krancken zuͦ letzt nit boͤser werden moͤg
dann sie zuͦm ersten war | vnd dem krancken nicht wider kum̄.
Recipe: Hungerkraut, Dürrbrot, Brunnensaft, Swelckruͤben. Yedes vier
wochen. Fiat Esus et detur summa cum parcitate.
Obgenante stück alle nym nit sambtlich | sunder ye eins nach dem andern
| vnnd brauch die zuͦ rechter zeyt | Dann jr krafft gar grosz | vnd
sie samptlich genummen wuͤrden | moͤcht der geschmack der krancken
person zum todt reychen | vnnd dir des felens halben gefengknusz
bringen. Aber recht gebraucht so ist die kunst probiert | vorausz inn
der zeyt da die Cappen von Hennen schier gemeystert wuͤrden.
Nun volgt ein Recept fuͤr solche kranckheyt darmit sie für kummen
werden mag.
Recipe: Maulschlosz, Demuͦt wasser, Keuschwurtz, Heuszlich bletter.
Yeglichs mit tugent.
Welche Fraw oder Magt | dise stuͤck taͤglich neust | vnd sich deren
fuͤr vnd fuͤr gebraucht | ist obgenanter sucht | on zweyffel ledig.
Ersparet den kosten | den lauff in solcher Keller | Apotek | erlangt
die Kron (der sie wert ist) aller ehren etc.
[Illustration]
[Illustration: Zierleiste mit Bärenjagd von Theodor Bang.]