_Thys letter be delyvyrde on to my fadyrynlav Rychard Wasse dewelly yn
the parris of Morton._
Welle belovyd fadyr, y recommende me on to you, and y thonke you of your
gode cherre to me beyng vyt you laste, &c. Fadyr, hyt ysso asfor the
promysse that ys by twyxt you and me, y hope to God to contayne you of
my promysse. So by that y am so lenge on y payde on to you, Fadyr, hyt
ysso ye have y lefte me yn so grete a danger wyt the reparasyon of
Wolston ande wythe Benet Barnarde that y am so lenge byhynde vyt you of
my promys; nere the les y have sende you by Herry Penennec iiij. mark a
fore Crystmas, ande the wederyng fyl so fowle a konnot go on to you.
Fadyr, hyt yesso y have payde Benet Barnarde viij. marke for the fe that
ye made on to hym, and more y moste pay hym for you, for he axyt of you
yn holle xij_li._ wyt the fe, ande hys labor that a dyde for you yn
London. For he sayt that ye nevyr payde hym of no fyne, nodyr for no
odyr coste that a dyde for you wylle ye werre yn thys contray. Therfore
y pray you to sende on to me a dyscharge for the sayde xij_li._, or
ellys a wolle dystrayne me and put me to scharge an coste as a hath
strayne my tenenttes byfore for thys mater and costys. For dermore
Boryng hath take an accion yn the comyn law ayenst us bothe, entendyng
to dryve us to a new particion, for a shewyth owre to tenentes to tempe
ande meve them to cry fore a noder particion, ande to have suche as
plesyth hym to hys reteyne; and therfore, but we have the better
consayle hyt woll cost moch mony wyth owt dowt. Ther fore send me suche
evydens as may dyscharge and save bothe you and me, wyche byth yn your
hon dysposal; hyt hath coste me xl_s._ for the accion that he hath take
ayenst Tomas Snel and Wyllyam Snell, for bycause that T. Snell
forbede[185-1] Bouryng ys tenents fro my wode yn Boter towne, which
bythe alders. Your doctor [_daughter_] recommende hyr on to you and
prayyt of your dayly blessyng, and sche hat a son, bleste by God. Namore
to you at thys tymme. God have you yn Hys kepyng.
By your Son,