_To the ryght worschypfull Master Roger Darsy and Master Gylys Alyngton,
beyng at the Jeorge, in Lumberd Strett, be thys delyveryd in hast._
[Sidenote: 1506 / JAN. 17]
Ryght worschypfull masters, I recomend me un to you, certyfying you that
the Kynges Grace and the Kyng of Castyle mett this day at thre of the
cloke, apon Cleworth Greyn, ij. mylle owt of Wyndesower, and ther the
Kyng reseyvyd hym in the goodlyest maner that ever I sawe, and ech of
them enbracyd oder in armys.
To schew you the Kynges aparell of Yngland, thus it was:--hys hors of
bay, trappyd with nedyll warke; a gown of purpuyr velvyt, a cheyn with a
joerge of dyamondes, and a hood of purpuyr velvyt, whych he put not of
at the mettyng of the seyd Kyng of Castylle; hys hatt and hys bonett he
avalyd, and the Kyng of Castylle in cas lyke. And the Kyng of Castyll
rod apon [a] sorellyd hoby, whych the Kyng gave un to hym; hys apparell
was all blak, a gown of blak velvytt, a blak hood, a blak hatt, and hys
hors harnes of blake velvytt.
To schew you of the Kynges company, my Lord Harry of Stafforth[173-1]
rod in a gown of cloth of tuyssew, tukkyd, furryd with sabulles, a hatt
of goldsmyth worke, and full of stons, dyamondes, and rubys, rydyng apon
a sorellyd courser bardyd with a bayrd of goldsmythes wark, with rosys
and draguns red.
And my Lord Markas[173-2] rydyng apon a bald sorelyd hors, with a deyp
trapper full of long tassels of gold of Venys, and apon the crowper of
hys hors a whytt fedyr, with a cott apon hys bak, the body goldsmyths
wark, the slevys of cremysyne velvyt, with letters of gold.
My Lord of Kent[173-3] apon a sorelyd hors, bald, the harnes of Venys
gold, with a deyp frynges of half zerd of lengh. My Lord of Kent cott
was on barr of cloth of gold, an oder of cremysyn velvyt, pyrlyd with a
demy manche cut of by the elbowe. Thyes be the lords that bare the
bruyt.
Sir Hew Waghan apon a bay hors trappyd with cremysyn velvyt full of gylt
bels, a gown of blak velvyt, and a cheyn of gold, bawdryk wys, worth v.
hondreth pownd.
Thys be the sperys: Master Sant John apon a blak hors, with harnes of
cloth of gold with tasselles of plunkytt and whytt, a cott of plunkytt
and whytt, the body of goldsmyths werk, the s[l]evys full of spanguls.
John Carr and William Parr cotts lyke, the horsys gray, of Parr trappyd
with cremysyn velvyt with tasselles of gold, and bels gylt. Carr hors
bay with an Almayn harnes of sylver, an ynch brod of betyn sylver, both
the cottes of goldsmythes wark the bodys, the slevys on stryp of
syllver, the oder gylt.
Edward Nevell apon a gray hors trappyd with blak velveyt full of small
belles, hys cott the on half of greyn velvyt, the oder of whytt cloth of
gold; thyse to the rutters of the spers, with oder dyvers well appontyd.
On the Kyng of Castylles party, the Lord Chamberlayn cheyff, I can not
tell hys name as yett; hys apparell was sad, and so was all the resydeu
of hys company with clokes of sad tawnye blake, gardyd, sum with velvyt
and sum with sarsnyt, not passyng a dosyn in nowmber. It is sayd ther is
many by hynd, wych cums with the Queyn of Castyll, wych schall cum apon
Teyusday.
When the Kyng rod forth to Wyndesouer Castyle, the Kyng rode apon the
ryght hand the Kynges of Castylle, how be it the Kynges Grace offeryd
hym to take hym apon the ryght hand, the whych he refussyd. And at the
lyghtyng the Kyng of Castylle was of hys hors a good space or owr Kyng
was a lyght; and then the Kynges Grace offeryd to take hym by the arm,
the whych he wold not, bot toke the Kyng by the arme, and so went to the
Kynges of Castylle chamber, whych is the rychestly hangyd that ever I
sawe; vij. chambers to geder hangyd with cloth of arras wroght with gold
as thyk as cowd be; and as for iij. beds of astate, no kyng Crystyned
can schew sych iij.
Thys is as fer as I can schew you of this day, and when I can know mor,
ye schall have knowlege.
From Wyndesouer this Saterday, at v. of the cloke.
By yours,