_To my righte trusty and righte welbelovyd counceillours, Sir Rauff
Shelton and Sir John Paston, Knyghtes._
[Sidenote: Year uncertain]
Righte trusty and righte welbelovyd counceillours, I comaunde me to you.
And ffor as moche as one Thomas Charlys of Norwiche late hathe presentid
unto me a bille of complaynte agaynste Symonde White, gentylman,
dwellyng in Shotesham, shewing by the same suche wrongis as the saide
Symonde hathe done and daily dothe to the saide Thomas, as by the saide
bille, whiche I sende you with this, more playnely apperith; I therfor
desire and pray you that ye woll do calle the saide parties byfore you,
and upon due examinacion had upon the mater conteyned in the saide
bille, ye take suche direction as may acorde with righte and gode
consciens, so as the saide Thomas Charlis heraftur have no cause to
resorte to me complaynyng. And Almightie God kepe you.
Writen at my castelle of Hedingham, the xv. daye of Septembre.