_To the right worshipfull and my right welbeloved counceilour, Sir John
Paston, Knyght._
[Sidenote: About 1491(?) / OCT. 28]
Right worshipfull and right welbeloved counceilour, I comaunde me to
you. Certifieint you that I wolde have be right glad to have had you,
the iij. persones that enformed you of Berkeleys demenyng, and Berkeley
togeder, to th’entent that I myght have had ripe knowleche of their
demenyng, to have shewed the Kynge at my comyng unto His Grace.
Nevertheles, sith I understand by your late wrytyng, to me brought by
the seid Berkeley the xxviij. day of this present monthe, beryng date
the Monday next before Seynt Symond Day and Jude, that ther is nat so
grete defaute in the same Berkeley as ye by your former writinges to me
sent wend [_thought_] ther had be, and that the defaute, if eny be, is
in one Spenser, maister of the shippe belongyng to the seid Berkeley,
and that ye thynke also that such suretee as I have take of the same
Berkeley is sufficient inogh, better or more than nedeth for that cause,
and that in your mynde ye thynke he woll be of gode guydyng and demenyng
in tyme comyng; I woll and desire you that ye delyver hym his shippes,
men, and goodes, accordyng to my first wrytyng to you sent in that
behalve. And Almyghty God kepe you.
Writen at my castell of Hedingham, the xxviij. day of Octobre.