_To the right worshypful sire, and my right trusty and right entierly
wel beloffyd freynde, Sire John Paston, Knyght._
ΙΗΣ. Χρς.
[Sidenote: 1490 / JAN. 27]
Ryght wortchipful sire, and myne especial and of long tyme apprevyd,
trusty and feythful frende, I in myne hertyeste wyse recommaunde me un
to you. And for as myche as I hafe coles and odyr thynges in thise
parties, and also ye hafe in those parties cornes, wyne, and wax, and as
I am enfourmyd ye be noght evyl wyllyd to dele with me, no more than I
am to dele with you in utteryng, and also in receyvyng of suche thynges,
the whiche myght be to the profete of us bothe, I ther fore send un to
you at thys tyme thys berer, William Walkere, gentylman usshere of my
chamber, to commune with you herein, so that by delyberation suche a wey
may be takyn in thys byhalfe as may be to the profete of either of us,
and wher by our familiarite and frendeship may be encrescyd in tyme to
cum. Where un to for our old acquayntance to gedyr, ye shal fynde me ful
redy after my powere, by the grace of our Lorde, Who ever kepe you, and
send you myche worship and long prosperite.
Scribyllyd in the moste haste, at my castel or manoir of Aucland, the
xxvij. day of January 1489.[132-1]
Your own trewe luffer and frende,