_To the right worshipfull and my right welbeloved counceilour, Sir John
Paston, Knyght._
[Sidenote: 1489 / MAY 6]
Right worshipfull and right welbeloved counceilour, I comaunde me to
you. And where as I understand by your wrytyng that a grete shippe is
perisshed with you in thoo parties, and that ye have ben gretely
occupied aboute the savyng of the goodes of the same; and that the
merchauntes therof ben disposed to put their wynes to sale, of the
whiche ye maye by a ton for C_s._ and litel more; I may by in this
cuntrey for iiij_li._, wherfore if ye may by there eny better chepe,
I pray you to purveye for me, such as ye seme necessary.
And forsomoche as ye may nat be here with me at this tyme, I desire and
pray you to prepare and ordeyne your self with as many men in harneys as
ye godely may, to do the Kyng service in my company, at the Kynges
charge and costes, so as ye and they may be with me at Cambrige, upon
Tewesday[129-1] next comyng; and that ye faile nat herof, as my right
especial trust is in you.
Writen at my castell of Hedyngham, the vj. daye of May.