_To the right worshipfull and my right welbeloved Sir John Paston,
Knyght._
[Sidenote: 1489 / APRIL 30]
Right worshipfull and right welbeloved, I comaunde me to you. And for as
moche as it is certeinly unto the Kynges Grace shewed that my Lord of
Northumberland havyng the auctorite to se the Kynges money levied in the
North parties, had knowleche that certeyne persones of combnes wer
assembled at Topclif, and at a nother lordship of his nygh to the same,
saying that they wolde pay no money; my seid Lord of Northumberland
heryng therof, and that they wer but naked men, addressed hym self
towardes theym withoute eny harneys in pesible maner, trustyng to have
appeased theym. Howe be it, as hit is seid, that he is distressed and
that they have taken hym or slayne hym; whiche the Kyng entendeth to
punysshe. I therfore desire and hertely pray you in all godely haste to
be with me at Hedyngham, there for to knowe more clierly the Kynges
plesir in this behalve. Writen at Hertford the last day of Aprile.
Also I send to you a comyssion of licence to shepp corne, which I pray
you to do to be proclaymed in alle haste.