_To my rygth wurchypfull mastyr, Syr John Paston, Knyth, this lettyr be
delyvered in hast._
[Sidenote: 1489 / FEB. 10]
Rygth reverent and worchypfull sir, in the most owmble wyse I recomand
me un to yow, desyryng to here of yowre welfare, the qwech God long
contynew.
Sir, myn brodyr Wyllyam recomawnd hym on to yow. And as for the lettyr
that ze sent on to hym, he hath schewyd my lord the entent ther off, and
he thynkyth hym self, that it is no part of hys dute to have any part of
the fysch, or any mony that schuld grow ther of. Never the lasse, my
lord, acordyng as yowr desyre was in the letter, had qwestyond John a
Lowe of thys fych, afor the comyng of John Danyel, what he had doon with
all; and he answerd, as for the nedyr chavyll [_jaw_] therof, he had put
it in sewrte, and leyd it in a howse, be cawse youre debyte [_deputy_]
seasyd it to myn lords use, tyll it myth be undyrstond wedyr the
propyrte ware in the Kyng or in my lord; and so my lord held hym well
content it schud be so, in so moche as the Kyng and my lord have
comawndyd John a Lowe that thys forsayd chavyll schuld be browth up to
the Kyng in all goodly hast.
Fardermore, my brodyr Wyllyam perseyvyd be yowre wrytyng that ye cowd
make the remnawnth of the fych worth a iiij_li._ to my lord. My lord
wold ze schuld not trobyll yowre self no more with all, becawse he
thynkyth that the propyrte is not in hym. And also anodyr, my brodyr
Wyllyam heryth sey in the corte, that the Kyng and my lord be content
that the remenaunt of the fych be to the use of them of the cuntre, the
wech ze schall here the more serteyn therof here after.
Also my broder Wyllyam seyth, that my lord wyllyd yow that ze schuld
send the retorne of the comyscion as hastyly as ze can, and mervell that
ze hath not sent it up or thys.
As touards the brekyng up of the Parlement,[118-1] many lykelywoodes
ther be, that it schuld contynew no wyle, and these be they. My Lord the
Archebyschop of Yorke departyd as zysterday, and my Lord of
Northethomyrlond schall goo as on Fryday; and also all schuch folkys as
schall goo in to Breten schall be at Portysmowth on Satyrday cum
forthnyth, and the Munday after on see bord, at wech seassun the Kyng
intentyd to be ther to take the mustyrs.
And as for thos jantylmen that toke schyppyng to a gon over in to Breten
up on a fortnyth a goo, that is to sey, Syr Richard Egecum, the
cowntroller,[118-2] Sir Roberd Clyfford, Sir John Trobylvyll, and John
Motton, sarjant porter, be a ryvyd ageyn up on the cost of Yngland, save
all only Syr Richard Egecum, wech londyd in Breten, and ther was in a
towne callyd Morleys, wech a non up on hys comyng was besegyd with the
Frenchmen, and so skapyd hardly with hys lyff, the wech towne the
Frenchemen have gotyn, and also the town callyd Breest; how be it the
castell holdyth, as we here say.
And ther be apoyntyd serteyn captens at thys seasun, wech be Lord Bruke,
Sir John Cheney, Sir John of Arundell, Sir John Becham, Sir John Gray,
myn broder Awdley, myn unkyll Syr Gylberd Debnam,[118-3] and Thomas
Stafford, and many odyr knytys and esqwyrys.
And, sir, I thanke yow for the lettyr that ze sent me. Also, syr, I have
fulfyllyd myn pylgremage, thanke it be God.
Also, sir, we undyrstond that it is anactyd of every x. marke of mevable
goodes xx_d._ to the Kyng, besyd the tennyth of every mannys londys.
And, sir, my brodyr Heydon schall send yow the serteyn of all odyr
thyngys grawntyd at thys Parlement, for he hath cawsed John Danyell to
tery all thys day for hys letter, be cawse he was with the Kyng at
Westmestre, that he myth not entend to wryth it tyl nyth.
Also, sir, Master Calthorp hath payd j.C. marke to the Kyng. Also, sir,
I have delyverd the x_li._ to Master Hawes, and reseywed of hym the
oblygacion. Also, I have delyverd the xx^ti marke to Edmund Dorman, be
my brodyr Heydons comawndment.
No more to yow at thys tyme, but God and the Holy Trinyte have yow in
Her kepyng. And myn syster Anne, with all the company, recomawnd hem on
to yow.
Wretyn at London, the x. day of Februar.
Be yowr servaunt,