_To my right wourschippfull and hertely welbeloved cousyn, Sir John
Paston, Knyght, this be delyvered._
[Sidenote: 1488-94]
Right wourschippfull cousyn, in as hertely wyse as I cane, I recommaund
me to you. And forasmoche as ther was appoynted a day that ye and my
cousyn Heydon, Sir Robert Brandon, the Kynges Attorney, and other of the
worschippfull of this schyr, should have mett here before this tyme of
Estren, it was so longe or the Kynges Attorney was commen in to the
contre, and the tyme so shorte, that it hathe bene thowght there myght
be non convenable tyme affor this. Wherfor they be agreed that they and
ye should mete here on Thursday next commyng. Prayinge you, therfor,
that ye wolbe here at that tyme, trustynge to Godes mercy that a right
good wey shalbe hadde betyx yow that all grugges and rancores shalbe
layd a parte. And therfor, cousyn, I praye yow that ye wol not fayle for
to be here, and what I canne do for yow, ye shall fynde it redy with
Godes grace, Who have yow in His most blessed and assured kepyng.
Wreten on Good Fryday last passed.
Zowir lofyng cosyn,