[Sidenote: [1487-1502] / AUG.]
Please your masterchep to have knowlage that my Lord Archebyschop of
Yorke[107-2] is in god helle, blyssyd be God. And I came to hym as on
Monday last past, and toke hym your letter. And whan I had takyn hym and
he had over sey it, he merveylle sor of hyr dysposicion, a bad me not
care, ye shuld do welle i nowe. And than he told me that he had spokyn
to Master William Paston for a note of a letter, hewghe it is best to
write to hyr. And so on Tewysday Master William and I, and Skerne of my
Lord of Oxenfordis hows, and mad (_sic_) toke hym on Wednysday o [_i.e._
one] not of a letter the wyche I send you; and whan he sey it he thowght
it to long, and mad one after his ownne entent, the wiche I send yow a
copy of. Also I send yow a copy of the letter that the quene sent to my
Lord of Oxenford for the maner of Cotton for Blyaunt; but my Lord of
Yorke told to Skerne that he wold in any wysse that my Lord of Oxenford
shuld help yow to kepe possession. And so Skerne purposythe to be with
in thys v. deyes at home, for to enforme my Lord of Oxenford of my Lord
of Yorke is entent, and that he se in no wysse that no man do yow no
wrong as moche as my Lord of Oxenford powyr may help yow; for Skerne
came from my Lord of Oxenford to my Lord of Yorke for the same mater,
for that my Lord of Yorke shuld informe the quene of the mater, and be
cause the quene hathe take hyr chambre my Lord of Yorke toke Skerne a
rynge for a tokyn to my Lord Tresorer[107-3] that he shuld excuse my
Lord of Oxenford to the quene, for as moche as ye hathe (_sic_) infeffid
my Lord of Oxenford in a trost in the maner of Cotton he may no lesse
doo but helpe yow. Item, thys day is the massenger gone to my Lady of
Suffolk with my Lordis letter. I shall have a answer at the morn on
Monday, I trost to God, ryght god, &c., it cowd non ere be sped. My Lord
hath be all this weke at the Cowncell at Chelchyche and j. day at
Chenne.[108-1] Item, I send yow iij. writtis for feleneys and trespace
and ij. for Mariete mater. Also your flowyr; Also a letter of Cablys;
Also a write for Playter, a letter to Mestres Clere. Item, my Lord wylle
in any wyse that ye kepe welle all the lyvelod that ye have of Sir John
Fastolff, and that ye suffyr no man to entre no lond nor place, lord nor
other personys, what sum ever they be. Ye may veryly thynke he ys your
speciall god lord, and that ye shall knowe in tyme comyng. I understand
that Calle dothe passyngly welle in your maters in the spirituall lawe,
as his letter makyth mencion, &c. Wretyn at London the Satyrday before
Seynt Lawrens day.
Your servaunt,