_To Dame Margery Paston, at Oxenhed._
[Sidenote: 1486-95]
Mastress Margerey, I recomand me to yow. And I prey yow in all hast
possybyll to send me, by the next swer messenger that ye can gete, a
large playster of your _flose ungwentorum_ for Kynges Attorney, Jamys
Hobart, for all hys dysease is but an ache in hys knee. He is the man
that brought yow and me togedyrs, and I had lever then xl_li._ ye koud
with your playster depart hym and hys peyne. But when ye send me the
playster, ye must send me wryghtyng hough it shold be leyd to and takyn
fro hys knee, and hough longe it shold abyd on hys kne unremevyd, and
hough longe the playster wyll laste good, and whethyr he must lape eny
more clothys aboute the playster to kepe it warme or nought. And God be
with yow.
Your,