_To my ryght wurchupfull mayster, John Paston, Esquyer, be this letter
delyverd in hast._
[Sidenote: 1482 / NOV. [3]]
Myne owyn swete hert, in my most humylwyse, I recomaund me on to you,
desyryng hertly to here of your welfar, the wheche I beseche Alle myghty
God preserve and kepe to His plesur, and your hertes desyer.
Ser, the cause of my wrytyng to you at this tyme: on Friday att nyght
last past come Alexander Wharton, John Hous, and John Fille, with ij.
good carts well mannyd and horsyd with hem to Marlyngford, and there at
the maner of Malyngford and at the mille lodyn bothe cartes with
mestlyon[58-2] and whete, and betymys on Saturday, in the mornyng, they
departyd fro Marlyngford towardes Bongey, as it is seyd; for the seyd
cartes come fro Bongey, as I soppose, by the sendynge of Bryon, for he
goth hastyly over the se, as it is seyd. And as I suppose he wyll have
the mestlyon over with hym, for the most part of the cart loodes was
mestlyon, &c.
Item, ser, on Saturday last past, I spacke with my cosyn Gornay, and he
seyd, if I wold goo to my Lady of Norffolk, and beseche hyr good grace
to be your good and gracyous lady, she wold so be, for he seyd that one
word of a woman should do more than the wordes of xx. men, yiffe I coude
rewyll my tonge, and speke non harme of myn unkyll. And if ye comaund me
so for to do, I trist I shuld sey nothynge to my ladys displesure, but
to your profyt; for me thynkyth bi the wordes of them and of your good
fermore of Oxned, that thei wyll sone drawe to an ende. For he cursyth
the tyme that ever he come in the ferme of Oxned, for he seyth that he
wotyth well that he shall have a grette losse, and yet he wyll not be a
knowyn wheder he hathe payd or nought; but whan he sethe his tyme, he
wyll sey trowth.
I understond by my seyd cosyn Gornay that my lady is nere wery of hyr
parte, and he seyth my lady shal come on pylgremage in to this towne,
but he knowth not wheder afore Cristmes or aftyr; and if I wold thanne
gete my Lady Calthorpe, my moder in lawe, and my moder, and myselfe, and
come before my lady, besechyng hyr to be your good and gracyous lady, he
thynkyth ye shull have an ende; for fayne she wold be redde of it with
hyr onowr savyd, but yette money she wold have.
No more to you at this tyme, butte I mervell sore that I have no letter
from you, but I prey God preserve you, and send me good tydynges from
you, and spede you well in your materes. And as for me, I have gotyn me
anothyr logyn felawe, the ferst letter of hyr name is Mastras Byschoppe.
She recomaundyth hyr to you by the same tokyn that ye wold have had a
tokyn to my Mayster Bryon.
Att Norwych, the Sonday next after the Fest of All Seyntes.
Be yowr servaunt and bedewoman,