Item, I wulle that the seid ele in which my body shalbe beried be newe
robed, leded, and glased, and the walles therof heyned [_heightened_]
convenyently and werkmanly.
Item, I wulle that myn executours purveye a stoon of marble to be leyde
alofte upon my grave within a yer next after my decesse; and upon that
stoon I wulle have iiij. scochens sett at the iiij. corners, wherof I
wulle that the first scochen shalbe of my husbondes armes and myn
departed, the ij^de of Mawtebysarmes and Berneys of Redham departed, the
iij^de of Mawtebysarmes and the Lord Loveyn departed, the iiij^te of
Mawtebysarmes and Sir Roger Beauchamp departed. And in myddys of the
seid stoon I wull have a scochen sett of Mawtebysarmes allone, and under
the same thise wordes wretyn, ‘In God is my trust,’ with a scripture
wretyn in the verges therof rehersyng thise wordes, ‘Here lieth Margret
Paston, late the wif of John Paston, doughter and heire of John Mawteby,
Squier,’ and so forth, in the same scripture rehersed the day of the
moneth and the yer that I shall decesse: ‘on whos sowle God have mercy.’
Item, I wulle that myn executours shall purveye xij. pore meen of my
tenauntes, or other if they suffice not, the whiche I wulle shalbe
apparailled in white gownes with hodes according, to holde xij. torches
abowte myn herse or bere at such tyme as I shalbe beried, during the
exequies and masse of my berying; which xij. torches I wille remayne in
the seid cherch of Mawteby whil they may last for my yerday.
Which yerday I wull myn heire kepe in the same cherch for me my seid
husbond and myn aunceteres yerly during the terme of xij. yeres next
after my decesse;[47-1] and I wulle that ich of the seid xij. pore meen
the day of my beriing have iiij_d._ Also, I wulle that iche preste being
at my berying and masse have viij_d._, and ich clerk in surplys iij_d._
Also, I wull that the preste which shall berie me have vj_s._ viij_d._,
so that he seye over me at the tyme of my berying all the whole service
that to the berying belongeth.
Also, I wulle that from the day and tyme that I am beried unto the ende
of vij. yeres than next folowyng be ordeyned a taper of wexe of a_li._
to brenne upon my grave ich Sonday and haliday at alle divine service to
be seid or sunge in the seid cherch and dailly at the masse of that
preest that shalle singe there in the seid ele for my sowle.
Item, I wulle that vj. tapers, ich of iiij_li._, brenne abowte myn herse
the day of my beryng, of which I wull that iiij. yerly be kept to brenne
abowte myn herse whan my yerday shalbe kept aslong as they may honestly
serve.
Item, I wulle have an honest seculer prest to synge and pray in the seid
ele for my sowle, the sowles of my father and mother, the sowle of the
seid John Paston, late my husband, and for the sowlys of his aunceteres
and myn during the terme of vij. yeres next after my decesse.
Item, I wulle that myn executours purveye a compleet legende in oon
book, and an antiphoner in an other book, which bookes I wull be yeven
to abide ther in the seid cherch to the wursship of God aslonge as they
may endure.[48-1]
Item, I wulle that every houshold in Mauteby as hastily as it may be
convenyently doo after my decesse have xij_d._
Item, to the emendyng of the cherch of Freton in Suffolk I bequethe a
chesiple and an awbe.[48-2]