_To my ryght worchepfull modyr, Margaret Paston, at Seynt Peter of
Hundgate._
[Sidenote: 1479 / NOV.]
Ryght worchepfull modyr, aftyr all dwtes of humble recomendacyon, as
lowly as I can, I beseche yow of your dayly blyssyng and preyeres. And,
moder, John Clement, berer heroff, can tell yow, the mor pite is, if it
pleasyd God, that my brodyr is beryed in the Whyghte Fryers at London;
whych I thought shold not have ben, for I supposyd that he wold have ben
beryed at Bromholme, and that causyd me so sone to ryd to London to have
purveyd hys brynging hom, and if it had ben hys wylle to have leyn at
Bromholm, I had purposyd all the wey as I have redyn to have brought hom
my grauntdame[28-2] and hym to gedyrs; but that purpose is voyd as now.
But thys I thynke to do when I com to London to spek with my Lord
Chamberleyn,[28-3] and to wynne by hys meanys my Lord of Ely,[28-4] if I
can; and if I may by eny of ther meanys cause the Kyng to take my
servyse and my quarrell to gedyrs, I wyll, and I thynk that Sir George
Brown, Sir Jamys Radclyff, and other of myn aqueyntance, whyche wayte
most upon the Kyng, and lye nyghtly in hys chamber, wyll put to ther
good wyllys. Thys is my wey as yet. And, modyr, I beseche yow, as ye may
get or send eny messengers, to send me yowr avyse and my cosyn Lomeners
to John Leeis hows, taylere, with in Ludgate. I have myche more to
wryght, but myn empty hed wyll not let me remembre it.
Also, modyr, I prey that my brodyr Edmond may ryd to Marlyngforthe,
Oxenhed, Paston, Crowmer, and Caster, and all thes maners to entre in my
name, and to lete the tenants of Oxenhed and Marlyngfor know that I sent
no word to hym to take no mony of theym but ther attornement; wherfor he
wyll not, tyll he her fro me ayen, axe hem non, but lete hym comand
theym to pay to servaunts of myn oncles, nor to hymsylff, nor to non
othyr to hys use, in peyne of payment ayen to me. I thynk if ther shold
be eny money axid in my name, peraventure it wold make my Lady of
Norfolk ayenst me, and cause hyr to thynk I dellt more contrary to hyr
plesure than dyd my brodyr, whom God pardon of Hys gret mercy. I have
sent to entre at Stansted and at Orwellbery, and I have wretyn a bylle
to Anne Montgomery and Jane Rodon to make my Lady of Norffolk, if it
wyll be.
Your sone and humble servaunt,