[Sidenote: 1479, or earlier]
Plesith it your mastresship to witte that I sende you a boxe with
evidence of Baktons londes, weche plesith it you to delyver to my
master, Sir John, so that I may have my money that is behynde. And as
for Sporle, I sende you an endenture of the bercars[20-2] and iij.
obligacions eche of v. marke. And as for any endenture of the wode sale
I made non, but a noote breefely of the effecte, wech I sende you, as I
tolde my mastre at Cristemas, and that tyme he seide to me he was the
better plesid, and so I ded no more therto; and an obligacion of C_li._
weche they be bounde to hym to performe ther ther covinauntes; weche
remayneth in the handes of the veker of Sporle. And I send you also ij.
billes of the parcell of the wode sale, bothe the wynter sale and the
somer sale, wherof the veker of Sporle and William Halman have the other
parties of them, as he comaunded hym selfe at the begynnyng. And lete my
countrelle doo what hym liste. I fynd hym a trewe man; he dothe as he
hath reported that he shuld go on my harond, and so I undrestond from
the[m] he hath do; but thow I have lost a frende of hym in that quarter,
I have mo frendes in that contre the[n] hee, etc. Mastres, it were goode
to remembre your stuffe of heryng nough this fisshyng tyme. I have goten
me a frende in Lestoftot to helpe to purvey me of an vij. or viij.
barell, and shal not stonde me upon above vj_s._ viij_d._ a barell, so
that he may have money nough in the begynnyng, ye shal do more nough
with xl_s._ then ye shal do at Cristemes with v. marke. The fisshyng at
Yermouth wol not be so goode as it wolbe at Leystoft, for the haven wol
not prove yette, etc. Almyghty God kepe you. Wrete this daye.
Be your servaunt, R. C.
[Footnote 20-1: [From Paston MSS., B.M.] This letter is not
addressed, but seems to have been intended for Margaret Paston.
The date is not very material, but as it mentions Sir John Paston,
it cannot be later than 1479, the year in which he died. Perhaps
it is about the year 1472. _See_ Nos. 819, 820.]
[Footnote 20-2: Barkers, or tanners to whom the bark of the woods
had been sold.]
956