_To hys ryth trusty and hartyly belovyd broder, John Paston, abydyng at
the Georg, at Powlys Qwharfe, in London, be this letter delyveryd._
[Sidenote: 1479 / JUNE 30]
Rygth worchypfull and hartyly belovyd broder, I recomaund me on to yow,
desyeryng feythfoly to here of yowr prosperyte, qwhych God preserve,
thankyng yow of dyverse letterys that yow sent me. In the last letter
that yow sent to me, ye wryt that yow schold have wryt in the letter
that yow sent by Master Brown, how that I schold send yow word what tyme
that I schold procede, but ther was non such wrytyng in that letter. The
letter is yet to schew, and yf yow come to Oxon, ye schal see the
letter, and all the leterys that yow sent me sythynnys I came to Oxon.
And also Master Brown had that same tyme mysch mony in a bage, so that
he durst nat bryng yt with hym, and that same letter was in that same
bage, and he had for gete to take owt the letter, and he sent all to
geder by London, so that yt was the next day after that I was maad
Bachyler or than the letter cam, and so the fawt was not in me.
And yf ye wyl know what day I was maad Baschyler, I was maad on Fryday
was sevynyth, and I mad my fest on the Munday after. I was promysyd
venyson a geyn my fest of my Lady Harcort, and of a noder man to, but I
was deseyvyd of both; but my gestes hewld them plesyd with such mete as
they had, blyssyd be God, Hoo have yow in Hys kepyng. Amen.
Wretyn at Oxon, on the Wedenys day next after Seynt Peter.