_To hys worchepful brodyr, John Paston, be thys delyvered in hast._
[Sidenote: 1478 / NOV. 7]
Ryght reverent and worchepful brodyr, I recomaunde me on to yow,
desyrynge to here of yowre welfare and prosperite; letynge yow wete that
I have resevyd of Alwedyr a lettyr and a nobyll in gowlde therin.
Ferthermor my creansyr [_creditor_], Mayster Thomas,[4-4] hertely
recomandyd hym to yow, and he praythe yow to sende hym sum mony for my
comons; for he seythe ye be xx^{ti}_s._ in hys dette, for a monthe was
to pay for when he had mony laste.
Also I beseche yow to sende me a hose clothe, one for the halydays of
sum colore, and a nothyr for the workyng days, how corse so ever it be
it makyth no matyr; and a stomechere, and ij. schyrtes, and a peyer of
sclyppers. And if it lyke yow that I may come with Alwedyr be watyr, and
sporte me with yow at London a day or ij. thys terme tyme, than ye may
let all thys be tyl the tyme that I come, and than I wol telle you when
I schall be redy to come from Eton, by the grace of God, Whom have yow
in Hys kepyng.
Wretyn the Saturday next aftyr All Halown Day, with the hand of your
brodyr,