Hault en valeur, poissant, de grant noblece,
Duit et apris en honneur et largece,
4 Trés agreable
Duc d'Orliens, seigneur digne et valable,
Filz de Charles, le bon roy charitable,
De qui l'ame soit ou ciel permanable,
8 Mon redoubté
Seigneur vaillant, par vostre grant bonté
Mon petit dit soit de vous escouté,
Ne par desdaing ne soit en sus bouté
12 Par pou de pris;
Si ne l'ait pas vo haultece en despris
Pour ce que j'ay pou de savoir apris,
Ou pour ce qu'ay faible matiere pris
16 Et hors l'usage
De vo bon sens qui n'escoute language
Qui tout ne soit trés vertueux et sage.
Mais a la fois point ne tourne a domage
20 A ouïr choses
De divers cas en textes ou en gloses,
Et meismement ou matieres encloses
Joyeuses sont, soient rimes ou proses;
24 Et par ouïr
Choses qui font par nature esjouïr
On fait souvent tristece hors fouïr.
Car trop grant soing tolt souvent a joïr
28 Cuer occupé
D'avoir soulas, quant trop envelopé
Est es choses ou il s'est entrappé,
Ne corps humain, tant soit bien attrempé,
32 Ne pourroit vivre
Toudis en soing; et j'ay leu en un livre
Que quant David, qui la loy Dieu voult suivre,
Vouloit estre de tristece delivré,
36 Lors de sa lire
Moult doucement jouoit, et souvent l'yre
Il rapaisoit de Dieu; et ouïr lire
Choses plaisans font souvent joye eslire
40 Aux escoutans.
Si n'est nul mal et en lieu et en temps
Lire et ouïr de choses esbatens.
Et pour ce, Prince excellent, mal contemps
44 Vous ne soiez
De moy pour tant s'ay desir que voiez
Un petit dit, lequel ay rimoiez
Ad celle fin que vo cuer avoiez
48 A soulacier
Aucunement. Si vous vueil commencier
A raconter, Dieu m'en vueille avancier,
Un grant debat dont j'oÿ fort tencier
52 A deux amans.
Car tout d'amours sera cilz miens rommans:
Si l'entendront François et Alemans
Et toute gent, s'ilz entendent rommans;
56 Mais jugement
Y apertient; si suppli humblement
Vo noble cuer qu'il daigne bonnement
Droit en jugier, si comme sagement
60 Le sara faire.
Car li amant, ou il n'a que reffaire,
Le requierent, et de tout cest affaire
Il vous chargent, noble Duc debonnaire,
64 Et si se tienent
A vostre dit, car bien scevent et tienent
Que droitturiers les jugemens qui viennent
De vous touz sont, nez ceulx qui appartiennent
68 Es faiz d'amours,
Qui aux jeunes font souvent changier mours
En bien ou mal, en joyes ou clamours;
Mais naturel est a tous cil demours,
72 Tant comme il dure,
Si ne le doit nul tenir a laidure;
Car tout ce qui est donné de Nature
Nul ne le peut tollir, dit l'Escripture.
76 Si vous diray
Le grant debat, ne ja n'en mentiray,
De deux amans, que je moult remiray;
Car leur descort a ouïr desiray
80 Et leur tençon
Gracieuse, non mie en contençon.
Ce fu en May, en la doulce saison,
Qu'assemblée ot en moult belle maison
84 Et gracieuse,
Qui a Paris siet en place joyeuse,
Compagnie joenne, belle et soingneuse
De soulacier: creature envieuse
88 N'ot en la route,
Fors de jouer, si com je croy sanz doubte.
Trés belle fu la compagnie toute,
Ou mainte dame ot qui d'amer n'ot goute
92 Et mainte gente
Damoiselle parée par entente,
Mainte gentil pucelle, et, que ne mente,
De chevaliers y avoit plus de trente
96 Et d'autre gent,
Beaulz et gentilz, papellotés d'argent,
Gays et jolis, assesmés bel et gent;
Si furent tous et toutes deligent
100 De joye faire.
La ot moult bons menestrelz plus d'un paire
Qui haultement faisoient le repaire
Tout retentir. Si devoit a tous plaire
104 Celle assemblée,
Car feste et joye y estoit si comblée
Qu'a cent doubles fu plus qu'autre doublée,
N'elle n'estoit de discorde troublée
108 Mais trés unie,
Toute tristece en estoit hors banie.
Et en place bien parée et ounie,
Grant et large, nette, non pas honnie,
112 Menoient tresche
Joyeusement par dessus l'erbe fresche;
Maint jolis tour, maint sault, mainte entrevesche
Y veïst on, et lancier mainte fleche
116 A doulz regart,
Tout en requoy traire par soubtil art,
Et qui mieulz mieulz chascun faisoit sa part
De ce que doulz Deduit aux siens depart.
120 Ainsi dançoient
Tous et toutes, ne point ne s'en lassoient,
Et en dançant leurs cuers entrelaçoient
Par les regars que ils s'entrelançoient.
124 Qui veist jolies
Femmes dancier a contenances lies
Si gayement de manieres polies,
A chapiaulz vers de flours et d'acolies,
128 Par mignotise
Bien avenant, doulcetement assise,
Rire et jouer, elles plaindre en faintise,
Parler attrait de maniere rassise,
132 Les contenances
De ces amans a chascun tour des dances,
Muer couleur, faire maintes semblances,
Moult en prisast les doulces ordenances.
136 Et puis après
Les menestrelz, qui bien jouoient très
Parmi chambres et parmi ces retrès,
Oist on chanter hault et cler a beaulz trèz
140 Bien mesurez.
A brief parler, tant furent procurés
La ris et jeux qu'il sembloit que jurez
Fussent d'ainsi estre a feste adurez
144 A tousjours mais.
Et moy, en qui tout anuy est remais
Depuis le jour que Mort de trop dur mais
M'ot servie, dont je n'aré jamais,
148 C'est chose voire,
Plaisir joyeux au monde, ains aré noire
Pensée adès pour la dure memoire
De cil que je porte en ma memoire
152 Sanz nul oubly,
Dont l'esperit soit ou ciel establi,
Qui seulete me laissa, n'entroubli
Ne fait mon dueil, ou que soye, affoibli
156 En nulle guise,
Fus sus un banc en cellui lieu assise
Sanz mot sonner, regardant la devise
Des fins amans gentilz, plains de cointise,
160 Tant renvoisiez
Qui de mener soulaz furent aisiez.
Mais je qui oz l'esperit acoisiez
Consideray que de tous les proisiez
164 De celle place
Un escuier, bel de corps et de face,
Y ot jolis, mais tant fut en sa grace
Qu'il sembloit bien qu'il eüst plus grant masse
168 De toute joye
Qu'autre qui fust ou lieu, se Dieux me voie;
Car mon regart a lui toudis avoye,
En remirant la gracieuse voie
172 De son maintien;
Car il dançoit et chantoit si trés bien,
Si liement jouoit, je vous di bien,
Que il sembloit que le monde fust sien,
176 Tant resjoÿ
Forment estoit, ou qu'il eüst jouÿ
De tous les biens dont oncqu' homme jouÿ,
Tant parestoit son gay cuer esjoÿ,
180 A droit voir dire;
Car ne finoit de jouer et de rire,
Ou de chanter et dancer tout a tyre.
Mais de ses jeulz nul ne peüst mesdire
184 Tant lui seoient,
Car les autres tous resjoïr faisoient,
Et ses soulas si gracieux estoient
Qu'a toute gent communement plaisoient;
188 N'il ne parlast
Fors en riant et sembloit qu'il volast
Quant il dançoit. Mais, quoy qu'il se celast,
A peine un pas de nul costé alast
192 Que de doulz oeil
Ne regardast simplement sanz orgueil
Telle qui fu present, ou tout son vueil
Estoit assis, mais par soubtil recueil,
196 Comment qu'il fust,
Son regarder gittoit, qu'on n'apperceust
Qu'a celle plus qu'a autre pensée eust.
Si ne cuide je pas que pou lui pleust,
200 Car bien sembloit
Que pour elle fust en amoureux ploit,
Tout non obstant que des gens tant s'embloit
Comme il pouoit. Mais l'amoureux esploit
204 Fort a celler
Est aux amans qu'Amours fait afoler
Par trop amer et venir et aler.
Ainsi surpris d'amours, a brief parler,
208 Cil sembla estre.
Mais près du banc ou je seoie a destre
Avoit assis decoste une fenestre
Un chevalier qui sus sa main senestre
212 Tint appoyé
Son chief enclin, comme tout anoyé
Et tout pensif, et pou ot festoyé,
Ne il n'estoit joyeux ne desroyé,
216 Ne esbatant
Ne sembla pas, mais n'estoit pas pour tant
Lait ne vieillart, ains de beauté ot tant
Com nul qui y fust et moult entremetant
220 En gentillece
Et en honneur sembla et de jeunece
Assez garny, jolis et sanz parece,
Mais bien sembloit que pou eust de leesce
224 Et pou de joye.
Car moy qui lors dessus le banc seoie
Soingneusement son maintien regardoie
Pour ce que si pensif je le veoie
228 Et sanz soulas,
Par maintes fois li oÿ dire, hé las!
Bassetement, n'estre ne pouoit las
De souspirer comme homme qui en laz
232 Est enserré;
Et avec ce tant ot le cuer serré
Que il sembloit qu'on l'eüst desterré,
Tant pale estoit, ou qu'il fust enferré
236 D'un fer trenchant.
Et non obstant qu'il s'alast embruschant
D'un chapperon, dessus ses yeulz sachant,
Qu'on n'aperceust le pié dont fu clochant
240 Ne son malage,
Et tout fust il loyal, secret et sage,
Si com je croy, si faindre son corage
Ne pot qu'il n'eust tout au long du visage
244 Souvent les larmes,
Tant ne pouoit estre constant ne fermes
Que couvrir peust les trés ameres armes
Qu'Amours livre a ceulz qu'il rend trop enfermes
248 Et maladis.
Ainsi cellui fut la, com je vous dis.
Morne, pensis et petit esbaudis.
Mais, si me doint Jhesu Crist paradis,
252 Telle pitié
Me fist de lui veoir si dehaitié
Qu'oncques homme, tant y eusse amistié,
Ne m'atendry le cuer a la moitié
256 Comme cellui
Me fist, que la je veoie a par lui
Morne, pensif, larmoier; ne nullui
N'apercevoit, je croy, l'anui de lui
260 Fors moy sanz plus.
Car les autres toudis de plus en plus
S'esbatoient, et cil estoit reclus
Entre la gent plus simple qu'un reclus,
264 Ne ne pensoit
Que le maintien qui triste le faisoit
Nul aperceust, car chascun y dançoit
Fors lui et moy, et pour ce ne cessoit
268 D'estre pensifs.
Mais la cause qui si le tint rassis
J'aperceu bien, car des fois plus de six
Mua coulour quant près de lui assis
272 Le corps gentil
D'une dame belle et gente entre mil
Estoit; adonc tout se transmuoit cil,
Si la suivoit aux yeulz, mais si soubtil
276 Fu son regart
Qu'apercevoir ne le peust par nul art
Nul ne nulle, n'avoit l'ueil autre part,
Dont j'aperceu et vi tout en appert
280 Que le meschief
Qui lui troubloit et le cuer et le chief
Venoit de la, je ne sçay par quel chief,
Mais sanz cesser souspiroit de rechief.
284 Ainsi se tint
La longuement, dont trop de mal soustint.
Mais or oiez après qu'il en avint:
Quant ot songié assez il se revint
288 Un pou a soy,
Comme homme qui un pou a sa grant soy
Estanchée; et je qui l'aperçoy
Le regarday, mais, s'oncques nul bien soy,
292 Me fu avis
A son regart et au semblant du vis
Qu'il aperceut que tout son maintien vis,
Et come la estoit si com ravis,
296 Si lui greva
Que veü l'os. Ne sçay comme il en va,
Mais assez tost de ce lieu se leva
Et vers moy vint et achoison trouva
300 De m'arresner.
Et moy qui moult me voulsisse pener
De l'esjouïr, se g'y sceusse assener,
Pour la pitié qu'oy eu, dont atorner
304 En tel conroy
L'avoie veu, quant devers la paroy
Le vi venir vers moy sanz nul desroy
Je me levay; mais, s'il fust filz de roy
308 Ou duc ou conte,
Sot il assez que gentillece monte.
Courtoisie, qui les bons en pris monte
Et qui aprent, enseigne, duit et domte
312 Tout bon courage,
Lui ot apris; adonc le doulz et sage
Si me rassist, et, sanz querre avantage
De nul honneur, humblement, sanz hauçage,
316 Dessus le banc
Decoste moy s'assist cil qui fu blanc
Et pale ou vis, ou n'ot couleur ne sang
Par trop amer, et son bras par le flanc
320 Adonc me mist
Courtoisement, et bellement me dist:
«Que pensez vous cy seule? Car il n'yst
De vous nul mot, bien croy qu'il vous souffist
324 De cy penser
Sanz autre esbat, pour quoy n'alez dancer?»
Et je respons: «Mais vous, sire, avancer
Pou vous en voy et ne deussiez cesser
328 De vous esbatre,
Ce m'est advis, car en ce lieu n'a quatre
Qui plus soient joennes, mais pou embatre
Je vous y voy, ne sçay qui fait rabatre
332 Si vo pensée?»
Et cil, qui voult la doulour qu'amassée
Avoit ou cuer moy celler, a pessée
Parole dist: «En peu d'eure est passée
336 Certes ma joye,
Tant suis rudes que dancer ne saroye
Ne autrement jouer, et toutevoie
N'ay je courroux ne chose qui m'anoye,
340 Mais c'est ma guise
D'estre pensif, ce n'est pas par faintise;
Dieux a en moy tel condicion mise.
Ou qu'il m'anoit ou que bien me souffise,
344 C'est ma nature.»
Ainsi parlions a bien basse murmure
Et ja avions conté mainte aventure
Quant vers nous vint cellui tout a esture,
348 Dont j'ay parlé
Ycy dessus, qui n'ot cuer adoulé
Ains fu joyeux; si a l'autre acolé
Tout en riant, et a lui rigolé
352 S'est bellement,
Et d'un et d'el parlerent longuement,
Mais sus amours tourna le parlement.
Si dist adonc l'escuier liement:
356 «A ma requeste
Parlons d'amours un pou, et, sanz arreste,
D'entre nous trois de deviser s'apreste
Son bon avis chascun, et s'amours preste
360 Plus joye ou mains
Aux vrais amans, vous pry a jointes mains
Qu'en devision, que nul ne l'oye; au mains
Pouons parler de ce dont joye ont mains.
364 Si faisons conte
Que c'est d'amer, de quoy vient n'a quoy monte
Ycelle amour qui le cuer prent et dompte,
A quoy c'est bon, s'onneur en vient ou honte;
368 Chascun en die
Ce qu'il en scet, ou se c'est maladie
Ou grant santé, ou se l'amant mendie
Qui dame sert. Le corps Dieu le maudie
372 Qui mentira
De son avis et qui tout ne dira
Des tours d'amours ce qu'il en sentira!
Or y perra qui le mieulx enlira.
376 Mais je conseil
Que nous yssions trestous trois hors du sueil
De cel huis la et alions en ce brueil,
Ou il fait vert, nous seoir en recueil
380 Joyeusement,
Pour deviser la plus secretement,
Que nul n'oye l'amoureux plaidement
Fors que nous trois.» Et adonc vistement
384 Nous nous levasmes,
Mais par mon loz une dame appellames
Avecques nous, qui het mesdis et blasmes;
Encore avec pour le mieulx y menames
388 Une bourgoise
Belle, plaisant, gracieuse et courtoise;
Par mon conseil fu fait, car qui racoise
Des mesdisans la murmure et la noise
392 Moult sages est.
Si partismes de la, et, sanz arrest,
Ou bel vergier entrames qui fu prest
A deduire, plus dru qu'une forest
396 D'arbres moult beaulx,
Qui en saison portent bons fruis nouviaulx,
Ou en printemps se deduisent oisiault,
Et en beau lieu, qui y fist ses aviaulx,
400 Fusmes assis.
Adonc cellui qui fu le moins pensis
Dist a l'autre qui ot plus de soussis:
«Dites, sire, car plus estes rassis
404 Et le plus sage,
Vo bon avis de l'amoureux servage,
S'il en vient preu, joye, honneur ou dommage?»
Et cil respont: «Beaulz amis, c'est l'usaige
408 Selon raison
Qu'en trestous cas et en toute saison
Honneur porte aux dames tout gentilz hom,
Premier diront, beau sire, et nous taison.
412 Dites, ma dame,
Vo bon avis de l'amoureuse flamme,
Se joye en vient ou dueil a homme et femme?»
Et celle dit et respont: «Par mon ame,
416 Je ne sçaroye
Qu'en dire au fort, quant est de moy loueroie
Que vous deissiez et voulentiers l'orroie,
Car proprement certes n'en parleroie;
420 Dites, beau sire,
Car je sçay bien que mieulx en sçarés dire.»
Et cil respont: «Ne vous doy contredire.
Ne vueille Dieux qu'a ce ja mon cuer tire
424 Que vous desdie.
Puis qu'il vous plaist, ma dame, que je die
Ce qu'il m'est vis, quoy qu'autre contredie,
Des fais d'amours et de la maladie
428 Qui vient d'amer,
Se plus en vient de doulz et moins d'amer,
Selon que sçay et que puis extimer
Par essaier et par m'en informer,
432 J'en parleray
Ce que j'en sens, ne ja n'en mentiray,
Combien qu'autres trop mieulz que ne sçaray
En parleroit, toutefois en diray
436 Tout mon avis,
S'oncques je sçoz cognoistre ne ne vis
Les tours d'amours par qui cuers sont ravis.
C'est un desir qui ja n'est assouvis,
440 Qui par plaisir
En jeune cuer se vient mettre et choisir
Lui fait amour; de ce naist un desir
De franc vouloir, qui le cuer vient saisir
444 De tel nature
Qu'il rent amant le cuer et plein d'ardure
Et desireux d'estre amé tant qu'il dure.
Mais tant est grant celle cuisant pointure
448 Qu'elle bestourne
Toute raison et tellement atourne
Cil qui est pris que du joyeux fait mourne
Et le morne en joyeuseté tourne,
452 Souvent avient.
C'est une riens de quoy l'omme devient
Tout tresmué, si qu'il ne lui souvient
De nulle honneur ne de preu ne li tient;
456 Souventes fois
Oublier fait et coustumes et drois,
Fors volenté n'y euvre en tous endrois.
C'est Sereine qui endort a sa vois
460 Pour homme occire.
C'est un venin envelopé de mirre
Et une paix qui en tout temps s'aÿre;
Un dur liain, ou desplaisir ne yre
464 N'a nulle force
Du deslier. C'est vouloir qui s'efforce
De nuire a soy; une pensée amorse
A desirer, par voie droitte ou torse,
468 Avoir aisance
De ce en quoy on a mis sa plaisance,
Et quant on l'a, n'y a il souffisance.
Car le las cuer est toudis en balance
472 S'il aime fort,
Car s'il avient que l'amant tant au fort
Ait fait qu'il soit amé, et reconfort
Lui soit donné, si me rens je bien fort
476 Que celle joye
N'yert ja si grant qu'Amours ne lui envoie
Mille soussis contre une seule voie
D'avoir plaisir, ne que ja son cuer voie
480 Asseüré,
Et tout soit il ou jeune ou meüré,
Ou bel ou bon, ja si beneüré
Ne se verra que trés maleüré
484 Il ne se claime
Souventes fois, se parfaittement aime.
Car Fortune, qui les discordes semme,
En plus perilz que nef qui va a reme,
488 Par maintes voyes,
Le fichera, mais le las toutevoies
Tout le peril ne prisera deux oies
Mais qu'il ne perde aucunes de ses joyes
492 Chier achetées.
Haÿ, vray Dieux! quantes doleurs portées
Sont es las cuers ou amours sont boutées!
Quant m'en souvient, de moy sont redoubtées
496 Les dures larmes,
Les durs sangloux et les mortelz voacarmes,
Et les souspirs plus poignans que gisarmes.
Et se parler en doy comme clerc d'armes,
500 Ce scet bien Dieux,
Et quel dongier et quel torment mortieulx
Porte l'amant, ou soit jeunes ou vieulx,
Pour faire tant qu'il lui en soit de mieulz
504 Devers sa dame,
S'il est a droit espris de l'ardent flamme
Qui par desir l'amant art et enflamme,
Avant qu'il soit amé, je croy, par m'ame,
508 Qu'assez endure
De griefs anuis, je ne sçay comme il dure
En tel torment, en si mortel pointure,
N'il n'a en soy autre soin n'aultre cure
512 Que celle part
Ou il aime; si a quitté sa part
De tous les biens que Fortune depart
Pour cellui seul, qui pou lui en espart,
516 Certes peut estre.
Ainsi le las son paradis terrestre
A fait de ce qui son cuer plus empestre,
Et tout soit il roy ou duc ou grant maistre
520 Fault qu'il s'asserve,
Ou vueille ou non, et que sa dame serve
Et vraye amour, ains que joye desserve.
Et puis y a encor plus dure verve:
524 S'on l'escondit,
Or se tient mort le las, or se maudit,
Et puis Espoir autre chance lui dit,
Puis Desconfort revient et l'en desdit;
528 Ainsi n'a paix.
En tous endrois le sert de divers mais
Ycelle amour, qui ne lairoit jamais
Avoir repos le cuer ou est remais
532 Cellui vouloir.
Mais supposé qu'a l'amant tant valoir
Lui vueille Amour que cause de doloir
N'ait en nul cas, ne lui doie chaloir
536 Fors de leece,
Et qu'a son gré du tout de sa maistrece
Il soit amé, qui lui tiegne promesse
Et loiaulté, ne croiez qu'a destrece
540 Pour tant ne soit;
Car Faulz Agait, qui moult tost aperçoit
Le couvine des amans et conçoit
Par leurs semblans leur fait, comment qu'il soit,
544 Ne s'en taist pas;
Si reveille moult tost, plus que le pas,
Les mesdisans, cui Dieux doint mau repas,
Qui font gaitier Jalousie au trespas
548 Et mettre barres
Es doulz deduis des amans et enserres.
Lors commencent et murmures et guerres
Souventes fois, trop plus grans que pour terres
552 Ne pour avoir.
Beau sire Dieux! qui pourroit concepvoir
Le grant tourment qu'il convient recepvoir
Au povre amant, qui ne peut bien avoir
556 Pour le parier
Des mesdisans qui lui tollent l'aler
Devers celle qu'il aime et veult celer.
Trop durement font l'amant adoler
560 Les mesdisans
Ou le jaloux, qui trop lui est nuisans.
Ceulz lui tollent ses doulz biens deduisans,
Dont tel dueil a qu'au lit en est gisans
564 En desespoir
Souventes fois, ou il se met apoir
En grant peril de mort, s'il n'a pouoir
De soy chevir autrement, ne espoir
568 Qu'autrement puist
Celle veoir pour qui le cuer lui cuist.
Encor y a une chose qui nuist
Trop aux amans et qui a dueil les duist
572 C'est jalousie,
Qui oublier fait toute courtoisie
Au las amant, qui si fort se soussie
Qu'il est aussi comme homme en frenesie
576 Et loings et près.
S'il s'aperçoit que un autre amant engrès
De celle amer soit, ou son cuer est trais,
Sachiez de voir, s'il y voit nulz attrais
580 Qu'elle lui face.
Il en muera sens et couleur et face,
Ne je ne cuid qu'autre meschief efface
Ce mortel soin, quoy qu'il se contreface
584 Joyeux ne lié.
C'est mort et dueil, qui estre appalié
Certes ne peut, n'en paix estre alié,
Le cuer qui est de tel tourment lié.
588 C'est une rage
Trop amere qui met l'omme en courage
De faire assez de maulz et de domage.
Pluseurs en ont honneur et heritage
592 Souvent perdu.
Qui jaloux est a meschief s'est rendu,
Mieulz lui vauldroit gesir mort estendu,
Mais grant amour lui a ce bien rendu
596 En guerredon;
Car trop amer si empetre ce don
Au pouvre amant, qui de son cuer fist don;
Si lui semble que trop perderoit don
600 S'un autre avoit
Le bien que si chier comparer se voit.
Mais certes se le las mourir devoit
N'en partiroit, nez s'il ores savoit
604 Que relenqui
Et delaissié l'eüst sa dame, en qui
Son cuer a tout, puis qu'amours le vainqui
Par un regart qui du doulz oeil nasqui,
608 Que il tant prise.
Et qu'a celle qui tant est bien apprise
Il s'est donné et qu'elle a s'amour prise;
Jamais nul jour n'en doit estre desprise,
612 Comme il lui semble,
Pour riens qui soit, mais tous les maulz assemble
En son las cuer: qui d'aïr sue et tremble
Et souvent het, et puis amour rassemble,
616 C'est dure dance
Et moult estrange vie et concordance;
Et tout d'amour en vient la dependence.
Ainsi en soy n'a ne paix n'acordance,
620 Ains derve d'yre
Le las amant jaloux, quant il ot dire
Ou apperçoit qu'a autre amour se tire
Celle de qui ne peut ouïr mesdire
624 Et si le laisse.
Si est plus serf que chien qu'on meine en laice,
Que le veneur tient n'aler ne delaisse;
Ainsi le tient celle qui pou l'eslece
628 En son dongier.
Ha! quel amour qu'on ne puet estrangier
Du dolent cuer, tant sache dommagier!
On s'en doit bien de dueil vif enragier
632 Que il conviengne
A force amer ce dont fault que mal viegne,
Et que subgiet obeïssant se tiengne
Le las amant, quelque mal qu'il soustiengne,
636 C'est grant merveille.
Amours! amours! nul n'est qui ne s'en dueille,
Cil qui te sert pou repose et moult veille,
Et trop pener lui fault, vueille ou ne vueille,
640 Qui tu accointes.
Mais regardons encore les plus cointes,
Les mieulz amez et ceulz qui n'ont les pointes
Qu'ont les jaloux, qui sont d'amertume ointes,
644 Sont ilz dehors
Ces grans meschiefs?--Je croy que non encors,
Ains y perdent pluseurs et ame et corps;
S'il m'en souvient et se j'en ay recors,
648 Quant sont peris
Par tel amour en France et a Paris
Et autre part! Ainsi furent meris
Jadis pluseurs amans: meismes Paris,
652 Qui belle Helaine
Ot ravie en Grece a moult grant peine,
Dont Troye, qui tant fu cité haultaine,
Fu puis arse, destruitte et de dueil pleine,
656 Ou fu perie
La plus haulte et noble chevalerie
Qu'ou monde fust, et si grant seigneurie;
Meisme a Paris durement fut merie
660 L'amour sanz faille,
Car Thelamon l'occist en la bataille.
Et deux amans autres, que je ne faille,
Reçurent mort, comme Ovide le baille
664 En un sien livre,
Pour celle amour qui les folz cuers enyvre;
Car moult souvent, pour joyeusement vivre,
S'assembloient, et leur vouloir ensuivre,
668 En un bouscages
Qu'ot nom Limaux; la les bestes sauvages
Devorerent l'amant, ce fu domages.
Et Piramus, l'enfant cortois et larges,
672 Et la trés belle
Doulce Thysbé, la jeunete pucelle,
Ne s'occirent ilz sus la fontenelle?
Soubz le meurier blanc il moru pour elle
676 Et elle aussi
S'occist pour lui, dont le meurier noircy
Pour la pitié dont morurent ainsi.
Ainsi grief mort les deux enfans corsi
680 Par trop amer.
Piteusement aussi peri en mer
Lehander qui, pour garder de blasmer
Belle Hero, qui le voult sien clamer,
684 Par nuyt obscure,
Le las amant! prenoit telle aventure
De mer passer en sa chemise pure,
Dont une fois, par grant mesaventure,
688 Y fu noyés
Par tempeste de temps. Voiez, voiez
Comment les las amans sont avoiez
Qui par amours sont pris et convoiez!
692 Qu'ont ilz de peine?
Et Achillès aussi pour Polixenne
Ne morut il quant en promesse vaine
Il se fia, dont mort lui fu prochaine?
696 Ne fut donc mie
Raison en lui bien morte et endormie
Quant il eslut pour sa dame et amie
Celle qui ert sa mortel anemie?
700 Mal lui en prist.
Ce fist Amours, par qui maint en perist,
Mais, quant mal vient aux gens, il s'en soubzrist.
Et ceste amour trop durement surprist
704 Aessacus,
Filz au bon roy Priant, qui si vaincus
Fu d'amer trop, que sanz querir escus
En mer sailli, comme trop yrascus
708 Que reffusé
L'ot celle, a qui long temps avoit musé;
Dont les fables, qui le fait encusé
Ont, tesmoignent qu'en plungon fut rusé
712 Et tresmué:
Si com se fu dedens l'eaue rué,
En cel oisel fut tantost remué;
Pour amour fu en tel forme mué,
716 En tel maniere,
Son corps gentil oncques n'ot autre biere;
Veoir le peut on en mainte riviere
Ou de noier encor monstre maniere;
720 Les Dieux de lors
Pour memoire changierent si son corps.
Mais regardons d'autres amans encors
Qui pour amer furent periz et mors
724 Et exillié.
Ypis aussi tant fort fu traveillié
Par tel amour, qui si l'ot bataillié,
Qu'il s'en pendi, comme mal conseillié,
728 A l'uis de celle
Qui reffusé a response cruelle
L'ot durement, et pour celle nouvelle
Le las s'occist; mais les Dieux de la felle
732 Vengence en pristrent,
Car ymage de pierre dure firent
Son corps cruel devenir; si la virent
Pluseurs dames qui exemplaire y prirent,
736 Ce fu raison.
Et a Romme, pour autelle achoison,
Un jouvencel s'occist qui sa raison
Ot comptée, ne sçay en quel saison,
740 A son amée;
Mais la felle, comme mal informée,
Le reffusa, et cil en la fumée
Tout devant elle a sa char entamée
744 D'agus couteaux,
Ainsi fina. Mais de temps plus nouveaux
Or regardons: de Tristan qui fu beaulz,
Preux et vaillant, amoureux et loyaulz,
748 Quelle la fin
En fu pour bien amer de vray cuer fin?
Ne le gaita son oncle a celle fin
Qu'il l'occisist et mort a la perfin
752 Il lui donna.
Mais celle amour Yseut si ordenna
Qu'entre les bras de son ami fina;
Par mon serment, cy piteuse fin a
756 De deux amans.
Et Cahedins, si com dit li romans,
Ne morut il plus noircy qu'arremans,
Pour tel amour: si fu ses testamans
760 Plein de pitié.
Encor depuis regardons l'admistié
Du chastellain de Coussy, se haitié
Il fu d'amours, je croy, qu'a grant daintié
764 En avoit bien,
Mais la dame du Faël, qui pour sien
Tout le tenoit, je croy, l'acheta bien,
Car puis que mort le sçot ne voult pour rien
768 Plus estre en vie.