aprochiet de le ville de Hainbon et il le virent forte et bien
breteskie, il fissent leur gens logier et amanagier, enssi qu'il
appartient, quant on voelt faire siège. Aucun jouene et legiers
compaignons geneuois, espaignol et franchois allèrent jusques as
baillez pour paleter et escarmuchier; et aucuns de chiaux de dedens
yssirent contre yaux, enssi que on fait souvent en telx besoingnes. Là
eult pluiseurs hustins, et pardirent plus li Geneuois et Espagnol qu'il
n'y gaignièrent, enssi qu'il avient souvent par lui follement
abandounner. Quant li soirs aprocha, chacun se retrai à se loge.
L'endemain, li seigneur eurent consseil qu'il feroient au matin
assaillir lez baillez fortement, pour veoir le contenanche de chiaux de
dedens, et pour veoir se il y poroient riens concquester. Au tierc jour
dou siège durant, il s'armèrent en l'ost et vinrent devant les murs,
environ heure de prime. Si coummenchièrent ung assault très fort et
très fier de traire et de lanchier et de faire touttes appertises
d'armes, et chil de d'ens à yaux deffendre de grant couraige. Et dura
chilz assaux continuelment jusques à heure de nonne, que Geneuois et
Espagnols, qui moult s'abandonnoient, furent durement lasset et
travilliet, et pluiseur mort et navret. Si se retraissent pour le
foule, et pour remettre à point lez blechiés. Quant li seigneur de
Franche virent leurs gens retraire et enssi que refroidiéz, si en
furent durement coreciet. Si fissent touttez mannierrez de gens retrère
avant et yaux encoragier et enhardir, et plus fort assaillir que
devant; et chil de dedens si s'efforchièrent ossi dou bien deffendre.
Là estoit la comtesse de Montfort toutte armée, montée sus un
courssier, et chevauchoit de rue en rue par le ville et semonnoit ses
gens de bien deffendre. Et faisoit les femmes de le ville, dammes et
autrez, deffaire les chauchies et porter les pières as cretiaux pour
jetter as ennemis; et faisoit aporter bombardes et pos plains de vive
cauch, pour plus ensonniier chiaux de l'ost. Fos 66 vo et 67.
_Ms. de Rome_: Ensi eurent messires Carles de Blois et li François la
chité de Rennes, et entrèrent dedens à grant joie. Et rechurent li
bourgois le dit mesire Carle à duch et à signeur et le menèrent à
l'eglise, et là jura solempnelment sus Saintes Ewangilles que il les
tenroit as us et as coustumes brettes; et tout devinrent si honme. Si
se rafresqirent quatre jours en la chité des biens qui lor vinrent de
sus le pais, et que il i trouvèrent. Et orent là li signeur consel
ensamble où il se trairoient, ou devant Vennes, ou devant Hainbon là où
la contesse de Montfort estoit. Consilliet fu que il iroient devant
Hainbon, et encloroient la contesse là dedens; et, se il le pooient
conquerir, lor guerre seroit finée. Si se departirent un jour de Rennes
en grant conroi, et s'en vinrent à Hainbon; et l'asegièrent par terre
et environnèrent si avant que il porent, car au lés deviers la mer il
ne pooient bastir nul siège.
La contesse estoit bien pourveue de ses amis, de chevaliers et
d'esquiers et de bonnes gens d'armes, les quels elle tenoit à ses gages
à Hainbon, à ville et chastiel. La contesse se tenoit ou chastiel, et
ses gens en la ville. Avoecques la contesse de Montfort, qant li
François vinrent là, estoient mesires Ives de Tigeri, li sires de
Landreniaus, li chastellains de Ghingant, li doi frère de Quirich,
messires Henris de Pennefort et messires Oliviers, son frère, et li
evesques de Lion en Bretagne, dou quel messires Hervis de Lion, qui se
tenoit avoecques messire Carle de Blois, estoit oncles. Entrues que li
François se logoient, li Geneuois et li Espagnols, des quels mesires
Loys d'Espagne, marescal de l'oost mesire Carle, estoit chapitainne,
voires avoecques lui mesires Othes Dorie, alèrent escarmuchier as
barrières. Et là vinrent chil de la garnison, qui vaillanment s'i
portèrent; et dura li escarmuce jusques au soir que tout se retraissent
as lors logeis. A l'endemain, de rechief on vint as bailles lancier et
escarmuchier; et en i ot biaucop de bleciés de une part et d'aultre. Et
entrues que li escarmuce estoit, on assalloit as murs priès que de
toutes pars, et chil de la ville se deffendoient vaillanment. La
contesse de Montfort, qui avoit coer d'onme et de lion, estoit armée et
montée sus un coursier, et amonestoit ses honmes de bien faire. Et
cevauçoit de rue en rue, et faisoit par les fenmes et les enfans
deffaire les cauchies, et porter la pière et les calliaus sus les murs,
et servir ceuls qui se deffendoient. Fo 79 vo.
P. 142, l. 22: li evesques de Lyon.--_Mss. A 20 à 22_: oncle à messire
(Hervi) de Lyon. Fo 135.--_Tous les autres mss. A et tous les mss. B
donnent la mauvaise leçon_: dont messires Hervis de Lyon estoit neveus.
P. 142, l. 26: Quirich.--_Mss. A 11 à 14_: Quintin. Fo 86 vo.
=§ 166.= P. 144, l. 7: Encores.--_Ms. d'Amiens_: Or pourés oïr une très
grant emprise et ung mervilleux et outrageux fait d'armes que ceste
comtesse fist. Elle qui oncques ne cessoit d'aller de l'un à l'autre
pour rencoragier sez gens, et ossi à le fois elle montoit en une haute
tour dou castiel pour mieux aviser le contenance de chiaux de l'ost, si
regarda une fois que elle estoit là montée, que tout li seigneur de
France et touttez mannierrez d'autrez gens estoient à l'assault et
entendoient si fort et si ententivement à l'assaillir, que tout li
logeis estoient ensi que wuit et sans garde. Que fist elle pour
adamager chiaux de l'ost? Elle requeilli environ trois cens compaignons
et les fist monter à cheval, et se parti de Hainbon par une fausse
postierne qui ouvroit sus le mer, auquel endroit il n'y avoit adonc
point d'assault; et prist son tour tout autour de le ville par voies
couvertez. Bien avoit qui mener le savoit, et s'en vint ens ès tentez
et ens ès logeis de France, et se feri dedens vassaument, et fist ses
gens espardre en pluisseurs lieux; car nulz n'y estoit, qui leur pewist
contredire, fors aucuns garchons et vallès chetilz. Là tuèrent il, et
boutèrent le feu à mout vent ens ès tentes et ens ès logeis lez
seigneurs de Franche. Tantost li feux s'esprist grans et villains, car
li une tente ardoit l'autre, tant que li punaisie et li fumière en
descendoit sour chiaux qui à l'assaut estoient. Quant li seigneur de
France virent leurs loges ardoir, et oïrent le hu et le cri qui de
celle part venoit, il furent tout esbahy et coururent vers leurs
logeis, en criant: «Trahi! Trahi!» Et ne demoura nuls à l'assault.
Quant la dessus dite comtesse vit l'ost estourmir et de touttes pars
gens acourir, elle requeilla et rassambla ses gens bellement et
sagement, et perchut bien que elle ne poroit rentrer en le ville sans
trop grant perte. Si s'en alla ung autre chemin droit par deviers le
castiel de Braait, qui siet à quatre lieuwes priès de là. Quant
messires Loeys d'Espaingne, qui estoit connestablez adonc de toutte
l'ost et qui ceste aventure avoit pris en grant despit, quant il parfu
venus as loges et il lez vit ardoir et flammer, et la comtesse et sa
gent qui s'en alloient quanqu'il pooient, il se mist en cace apriès
yaux pour yaux raconssuiwir en criant son cor, et chacuns sieuwi sa
bannierre. Si furent durement enchauchiés la comtesse et li sien; et en
tuèrent aucuns qui estoient mal montés. Et dura li cace jusquez à
Braait, où la comtesse et li sien se sauvèrent et boutèrent; et lez
requeillirent chil de laiens à grant feste.
Quant messires Loeys d'Espaingne seult par les prisonniers que pris en
cette cache avoit, que c'estoit la comtesse qui che destourbier li
avoit portet et à toutte l'ost, si fu durement courouchiéz de ce que
elle li estoit escappée ensi. Si s'en retourna deviers leur ost et
compta as seigneurs que ce avoit estet la comtesse de Montfort qui
ceste envayée leur avoit fait: si en furent durement esmervilliet li
ung par l'autre coumment elle avoit oset entreprendre tel fait, et li
mettre en si grant aventure et en tel parti d'armes. Se li tinrent li
aucun à outraige et à folie, et li autre à proèce et à vaillanche. Se
chil de dehors en estoient esmervilliet, chil de dedens, ses gens
meymmez, l'estoient plus; et ne pooient apenser coumment la comtesse
avoit tout ce adviset, ne oset entreprendre. Mais il furent, le parfait
dou jour et toutte la nuit enssuiwant, en grant frichon et esmay de ce
que la damme ne nulx de ses compaignons ne retournoit: si n'en savoient
que pensser, ne quoy adviser; et se doubtoient que elle ne fuist prise,
et toutte la compaignie qui avoecq lui yssi, ossi morte ou prise au
mieux venir. Fo 67.
_Ms. de Rome_: Encores s'avisa celle contesse de une très grande
emprise que on li doit bien tourner à vaillance, car elle fist environ
deus cens honmes des siens monter as cevaus, et puis fist ouvrir une
porte où nuls n'asalloit. Et se partirent, elle et ses gens, et s'en
vinrent par derrière bouter et fraper ens ès logeis des François, qui
n'estoient pour l'eure gardé que de varlès et garçons, car tout honme
d'armes entendoient à l'asaut ou il le regardoient. Qant la contesse fu
là venue, elle fist bouter le feu en plus de trente lieus. Li feus et
la fumière s'eslevèrent; la noise et li cris conmenchièrent à lever.
Chil qui asalloient, laissièrent tout quoi ester les assaus, et
s'esmervilloient que ce pooit estre. Et perdirent li signeur, par celle
emprise et ce feu, grant fuisson de lors chevaus et de lors
pourveances.
Messires Lois d'Espagne, marescaus de l'oost, fu auques li uns des
premiers qui retournèrent sus les logeis, et entendi que la contesse de
Montfort avoit fait celle emprise. Il ne fu pas si courouciés dou
damage que il fu resjois de ce que la contesse estoit hors de la
garnison, et cria en hault: «Or, tos as chevaus! Celle fenme et sa
route soient poursievoit! Jamais ne renteront en Hainbon, ne en
forterèce qui soit en Bretagne: il sont nostre. Aultrement ne poons
nous avoir fin de gerre.» Lors veissiés toutes gens haster et monter
sus chevaus, et euls asambler dalés le marescal qui faisoit sonner ses
tronpètes à grant effort pour requellier ses gens; et prendoient le pas
de la ville pour enclore la contesse au dehors, ensi que il fissent. La
contesse perchut bien que point ne poroient rentrer en Hainbon. Si
prist les camps et dist à ces gens: «Chevauçons viers Brest. La
garnison est pour nous. Là serons nous receu.» Il fissent ensi que elle
ordonna, et prisent le cemin de Brest, et estoient jà moult eslongiet
avant que on s'en perçuist en l'oost; car messires Lois d'Espagne et li
François avoient clos les pas et les rentrées en Hainbon, à la fin que
il fuissent au desus de la contesse et de ses gens. On vint dire et
nonchier à mesire Lois: «Sire, vous arestés ichi pour noient; la
contesse et ses gens s'en vont viers Brest.»
Qant messires Lois d'Espagne oï ces nouvelles, si dist: «Apriès!
apriès!» Lors veissiés toutes gens desrouter et ferir à l'esporon
apriès la contesse. Ce jour furent li François bien ensonniiet, car li
auqun entendoient au cachier, et li aultre à estaindre le feu qui se
mouteplioit ens ès logeis, qui lor fist grant damage de lors chevaus,
de lors harnas et de lors pourveances. Meismement li auqun François
disoient l'un à l'autre: «Veés la vaillant contesse, et qui bien scet
guerriier et a fait aujourd'ui une grande emprise, issu de la ville de
Hainbon, ars nostres logeis, fait cesser l'asaut de devant Hainbon; et
encores s'en va elle à Brest, et tout acomplira ces emprises sans son
damage.» Il disoient verité, car onques mesires Lois d'Espagne ne sa
route ne le peurent rataindre; mais s'en vint bouter ou chastiel de
Brest. Il i eut bien auquns de ses honmes mal montés qui furent
raconsievi sus le cemin, et chil là demorèrent prisonnier et en la
volenté de lors ennemis.
Trop fu mesires Lois d'Espagne courouchiés qant il vei que la contesse
de Montfort li estoit escapée et entrée ou chastiel de Brest. Si s'en
retourna tout le pas. Tant estoient lor ceval essouflé que jusques à la
grose alainne. Et vinrent li François as logeis et trouvèrent que on
estoit moult ensonniiet de remetre à point tentes et trefs, et de faire
nouviaus logeis de fuellies, et de envoiier as pourveances à Rennes et
sur le plat pais, car les lors estoient moult adamagies. Messires Lois
d'Espagne, qant il fu descendus et desarmés, il se traist devant la
tente de mesire Carle de Blois. Et là estoient li contes de Blois, li
dus de Bourbon, li contes de Pontieu, li contes d'Eu, connestables de
France, et li sires de Chastellon; et ne se pooient taire à parler de
ceste contesse de Montfort, de la hardie et outrageuse emprise que elle
avoit fait. Et qant messires Lois d'Espagne fu venus, encores li
demandèrent il de la cace et conment elle li estoit escapée. Il
respondi bien: «Elle s'est sauvée, et ses gens aussi, et bouté dedens
le chastiel de Brest.»--«Or bien, respondirent il, puisque elle est là,
elle s'i tenra; et de tant est la garnison de Hainbon afoiblie de force
et de consel, car elle en a mené avoecques li biaucop de bonnes gens.»
Ensi se apaisièrent il en l'oost et passèrent la nuit. Et avoient esté
le jour lassé et travilliet, tant pour le assaut qui fu grans, que de
la cace que il avoient fait apriès la contesse, que de ce que il
avoient esté trop destourbé des logeis auquns que on lor avoit ars; et
ne se doubtoient de nului, car il sentoient la contesse à Brest, si
ques sus la fiance de ce il dormirent la nuit et la matinée plus
longement. Fo 80.
P. 144, l. 12: tout cil de l'ost.--_Ms. B 6_: excepté les garçons qui
gardoient les chevaus. Fo 201.
P. 144, l. 16: trois cens.--_Ms. B 6_: cent. Fo 144.
P. 144, l. 21: arses.--_Ms. B 6_: car bien le tiers de leur trés et
pavillons fust tout ars. Fo 201.
P. 145, l. 4: à trois liewes priès de là.--_Mss. A 11 à 14_: à quatre
lieues près de là. Fo 87.--_Mss. A 1 à 7, 18 à 33_: qui siet assez près
de là. Fo 90.
P. 145, l. 24: quisençon.--_Mss. A 1 à 6, 15 à 19_: cuisanson,
cuisançon. Fo 90 vo.--_Mss. A 11 à 14, 20 à 33_: mesaise, malaise. Fo
87.
=§ 167.= P. 145, l. 28: A l'endemain.--_Ms. d'Amiens_: Quant ce vint à
l'endemain, li seigneur de France, qui avoient perdut lors tentez et
lors pourveanchez, eurent consseil que il se logeroient de arbres et de
foeillies plus priès de le ville, et qu'il se maintenroient plus
sagement. Si se allèrent logier à grant painne plus priès de le ville,
et disoient en gabois à chiaux de le fortrèche: «Alés, seigneurs, allés
requerre vostre comtesse. Certez, elle est perdue, vous ne le trouverés
en pièche.» Quant chil de Hainbon, gens d'armes et autrez, oïrent tels
parollez, il furent esbahit et eurent grant paour que grans encombriers
ne fust avenus à la damme. Si ne savoient que croire, pour tant que
elle point ne revenoit, ne n'en ooient nulles nouvelles. Si demourèrent
en tel paour et en tel esmay de leur damme par l'espasse de cinq jours.
Or vous diray de la comtesse de Montfort quelle cose elle fist. Se elle
avoit fait une felle emprise, encorres, ce me samble, fist elle ossi
perilleuse. Et sachiéz que là où elle estoit ens ou castiel de Braait,
elle n'estoit point à se aise, pour tant que elle penssoit bien que ses
gens de Hainbon ne savoient point que elle estoit devenue. Si s'avisa
que elle metteroit tout pour tout et que, se elle estoit yssue d'un
peril, encorres ysteroit elle dou second. Si se pourcacha tant que elle
ot bien cinq cens compaignons armés et bien montés; puis se parti de
Braait entour le mienuit, et s'en vint droit au point que li sollaux se
liève, à chevauchant, à l'un de(s) costé(s) de l'ost. Et envoya devant
à Hainbon et fist ouvrir le porte, et entra ens à grant joie et à grant
son de trompes et de naquairez et de cornemuses: de quoy li hos des
Franchois fu durement estourmis. Si se fissent tout armer et coururent
par deviers le ville pour assaillir, et chil de dedens as fenestres
pour le deffendre. Là commencha grans assaux et fors, qui dura jusques
à haulte nonne; mès toudis y mettoient plus chil de dehors que cil de
dedens.
Environ l'eure de nonne, li seigneur fissent cesser d'assaillir, car
leurs gens se faisoient tuer et navrer sans raison; si se retraisent à
lors logez. Et eurent, quant tout furent retret, li seigneur consseil
que messires Carlez de Blois, li dus de Bourbon, messires Jaquemes de
Bourbon, li comtez Loeis de Blois, li comtez d'Auçoire, li comtes
Raoulz d'Eu, li comtes de Ghines, sez filz, li marescaus de France,
messires Robers Bertrans, messires Carlez de Montmorensi, messires
Ghuis de Cantemarle, li sires d'Avaugor et grant fuison d'autres
seigneurs et leurs gens yroient devant (le) chastiel d'Auroy, que li
roys Artus fist fonder. Et messires Loeis d'Espaingne, li viscomtez de
Rohem, li sires d'Ansenis, li sires de Tournemine, li comtes de Joni,
li sires de Rais, li sires de Rieus, li sires de Gargoule, messires li
Ghalois de le Baume, messires Othes Doriie, messires Carlez Grimaus et
tous li remannans dez Geneuois et d'Espagnols demorroient devant
Hainbon; et manderoient douze grans enghiens qu'il avoient laissiet à
Rennez, pour jetter à le ville et au castiel de Hainbon; car il veoient
bien qu'il ne le poroient gaegnier, ne pourfiter à l'assaillir. Si ques
il fissent deux hos: s'en en demora li une devant Hainbon, et li autre
en alla assegier le castiel d'Auroy qui est moult fors; et bien
pourveus estoit adonc de gens d'armes et de touttez pourveanchez. Et
l'avoit la sepmainne (devant) la comtesse de Montfort rafreschi de gens
d'armez et envoiiet deux vaillans chevaliers, en qui mout se fioit,
pour gardiien et cappittainne dou dit fort: c'estoit messires Henris de
Pennefort et messires Oliviers, ses frèrez. Fo 67.
_Ms. de Rome_: Se la contesse de Montfort avoit fait, ce jour que elle
issi hors de Hainbon, une hardie emprise, et que elle vint en Brest,
encores fist elle parellement une aultre moult aventureuse. Et li
signeur de France ne furent pas bien consellié qant il sentoient que
elle estoit hors, et il ne missent enbusques sur li, dont depuis il
s'en repentirent. Je vous dirai cause pourquoi. Qant la contesse fu
venue en Brest, elle et ses gens mengièrent et burent moult
legierement, et dormirent environ trois heures. Et qant il se furent
rafresqi euls et lors chevaus, la contesse les fist resvillier et
apparillier et armer, et prist encores jusques à cent compagnons de
ceuls de Brest, et fist là laissier tous les foibles cevaus et
renouveller d'aultres. Et partirent de Brest, la contesse tout devant,
sus le point de mienuit; et chevauchièrent les bons galos le cemin de
Hainbon. Et disoit ensi la contesse en cevauchant: «Ma bonne gent de
Hainbon sont, je le sçai bien, à grant malaise de moi. Il fault que je
les reconforte et que nous rentrons en la ville, et je vous aprenderai
conment. Quant nous deverons aprochier la ville et l'oost, li une part
des nostres iront estourmir et resvillier l'oost, et li aultre
s'adrecera droit à Hainbon et fera ouvrir les bailles, avaler le pont
et ouvrir la porte. Et sitos que li hoos se conmencera à estourmir, il
se retrairont tout bellement, et nous les atenderons devant les
barrières; et ensi petit à petit il renteront, et nous aussi, dedens
Hainbon.»
Ensi que la contesse de Montfort ordonna, il fu fait. Qant il orent
cevauchiet depuis que il se furent departi de Brest, il vinrent droit
sus le point dou jour assés priès de l'oost et de Hainbon. Il
ordonnèrent messire Guillaume de Qadudal et mesire Ivon de Tigri, à
deus cens honmes, aler escarmuchier et resvillier l'oost; et la
contesse et le demorant venroient, entrues que on ensonnieroit les
François, as bailles, et les feroient ouvrir. Lors s'en vinrent li doi
chevalier et lor route sus l'oost; et entrues la contesse et li aultre
prissent un viés chemin herbu, qui s'adreçoit droit sus les fossés. Ces
deus coses furent faites tout à une fois. Li hoos resvillie à l'un des
corons, et entrues que li estourmie se conmença à eslever, chil de
d'ens orent congnisance que lor dame estoit à la porte, car celle nuit
tout chil de Hainbon velloient et estoient trop esbahi et desconforté
de lor dame la contesse. Qant il entendirent que elle estoit si priès
de euls, si furent resjoi grandement, et avalèrent le pont et ouvrirent
la porte et puis les barrières. Tout descendirent et missent lors
chevaus dedens la ville, et puis s'ordonnèrent en atendant lors gens
qui revenoient et qui avoient estourmi l'oost; et ne furent adonc de
nului poursievi, et rentrèrent tout dedens la ville et le chastiel de
Hainbon. Qant ce vint au matin, li François orent bien congnissance que
la contesse de Montfort estoit retournée; si tinrent son fait et son
emprise à très grant vaillance. Et dissent li signeur entre euls que li
diables portoient celle contesse. Fo 80 vo.
P. 146, l. 14: se parti.--_Ms. B 6_: au tierch jour. Fo 202.
P. 146, l. 17: entra.--_Ms. B 6_: à plainne nonne. Fo 202.
P. 147, l. 11: ala.--_Ms. B 6_: Sy se departirent à tout deux mille
homes à cheval et quatre mille à piet, geneuois et autres; et s'en
vinrent devant le chastiel d'Auroy et le assegèrent. Fo 202.
=§ 168.= P. 147, l. 15: le chastiel d'Auroy.--_Ms. d'Amiens_: Quant
messires Carlez de Blois parfu venus à toutte se host, il le assiega
(le chastiel d'Auroy) tout environ, et fist envoiier dire à chiaux de
dedens que il se voisissent rendre, et il leur pardonroit son
mautalent; et feroit à chiaux de Pennefort otel pourfit, tous les ans,
qu'il avoient de par la comtesse, ou plus grant, et lez retenroit de
son consseil. Il n'eurent mies accord ne volenté dou faire; et
respondirent qu'il estoient trop fort loiiet et acouvenenchiet à leur
seigneur que on tenoit en prison, ossi à leur damme, et que il se
travilloient en vain, qui de nul traitiet leur parloi(en)t. Dont dist
messires Carlez de Blois que jammais de là ne partiroit si lez aroit à
sa vollenté, et fist le castiel fortement assaillir par pluiseurs fois.
Mès peu y gaegnièrent li assallant, car cil dou castiel estoient bien
trois cens compaignons tous armés, et si avoient bonne cappittainne
dont il valloient le mieux; et quoyque cil d'Auroy se deffendesissent
si bien, si estoient il souvent assaillit et escarmuchiet.
A quattre lieuwes priès d'Auroy, siet la bonne cité de Vennez qui se
tenoit fortement à le comtesse; et en estoit messires Joffroy de
Malatrait cappittainne, gentil homme et vaillant durement. D'autre part
siet la bonne ville de Dinant en Bretaingne, qui n'estoit fremée fors
de fossés et de palis. Si en estoit cappitainne de par le comtesse de
Montfort uns durement vaillant homs, que on clammoit le castelain de
Ghinghant; mès il estoit assis adonc dedens Hainbon avoecq la dessus
ditte comtesse. Si avoit laissiet à Dinant, son hostel, medamme sa
femme et ses fillez, et avoit laissiet cappittainne en lieu de lui
monseigneur Renault, son fil, vaillant baceler et hardi homme durement.
Entre ces deux bonnes villez de Vennes et (de) Dinant, seoit uns très
fors castiaux qui se tenoit à monseigneur Carle de Blois. Et nomme hom
le dit castiau le Rocheperiot, très fort lieu durement; ne oncques li
comtez de Montfort ne le peut prendre par assault, ne par traitiet. Et
l'avoit li dis messires Carlez (de Blois) fait bien garnir de gens
d'armes et de saudoiiers, qui tout estoient bourghignon. Si en estoit
souverains d'iaux ungs vaillans escuiers et assés jonez, que on
clammoit Gerart de Malain; et avoit avoecq lui ung hardi et bon
chevalier, que on clammoit messire Pière Portebuef. Chil doi
cappittainne de Rocheperiot avoecq leurs compaignons honnissoient et
gastoient tout le pays de là entours; et destraindoient si ouniement la
chité de Vennes et la bonne ville de Dynant, que nulle pourveance ne
marchandise ne pooit entrer ne venir, fors que en grant peril sus grant
aventure. Car il chevauchoient ung jour par deviers Vennes, l'autre
jour par deviers Dinant; et estoient si cremut et si redoubtet ou pays,
que là environ on ne parloit d'autre garnison fors que de Rocheperiot.
Tant allèrent et tant chevaucièrent de l'un à l'autre, que li jones
bachelers messire Renaux de Ghinghant fist ung soir embusche sur yaux.
Et par une matinée, enssi que il avoient chevauchiet deviers Dinant, et
avoient rués jus bien vingt quatre marcheans et les enmenoient
prisonniers en leur fortrèce, messires Renaulz leur vint sus elle à
toutte sen enbusche et se feri en yaux vassaument; et se porta si bien
et chil qui avoecq lui estoient à ce donc, que il desconfissent messire
Pière Portebuef et Gerart de Malain et tous les Bourghignons qui avoecq
lui estoient, et rescouissent lez marcheans et enmenèrent les deus
cappittainnes prisonniers et bien vingt cinq des leurs en le ville de
Dinant en Bretaingne, où il furent recheu à grant feste. Ceste nouvelle
resjoy moult chiaux de Vennez et dou pais environ, et en fu li
dammoisiaux messires Renaus durement prisiéz. Or lairay à parler de
ciaus de Dinant, de Vennez et de Rocheperiot. Si parleray dou siège de
Hainbon et de monseigneur Loeis d'Espaingne, ossi de la comtesse de
Montfort.