TRATTENEMIENTO VI De la Jornata V.
_Sapia, figlia de na gran Baronessa, fa deventare ommo accuorto
Cenzullo, che era figlio de no Rrè, che non poteva capere lettere;
lo quale pe no boffettone, che le dette Sapia, volennose vennecare,
se la pigliaje pe mmogliere, e dapò mille strazie, avutone, senza
sapere cosa nesciuna, tre ffiglie, s’accordarono nsieme._
_Fecero na prejezza granne lo Signore Prencepe, e la Prencepessa,
quanno veddero arrivare a buon termene le ccose de Talia, che non
se credevano maje, che drinto a tanta borrasca trovasse sto puorto,
e dato ordene ad Antonella, che sfodarasse lo cunto sujo, essa
accossì mese mano._
Tre so le specie de li gnorante a lo munno, che meretarriano l’uno
cchiù dell’autro essere puoste a no furno: lo primmo, che non sà: lo
secunno, che non vò sapere; lo tierzo, che pretenne de sapere: De la
seconna spezia, è lo gnorante de chi v’aggio da parlare, lo quale non
volenno farese trasire nchiocca lo ssapere, odia chi nce lo nvezza, e
nuovo Nerone, cerca de levarele la via de lo ppane.
Era na vota lo Rrè de Castiello chiuso, ch’aveva no figlio accossì
capo-tuosto, che no nc’era remmedio, che bolesse tenere a mmente l’A.
B. C. D. e sempre che se le parlava, de lettere, e de mparare, faceva
cose de fuoco, che non jovavano strile, nè mmazziate, nè mmenaccie de
manera, che lo negrecato patre nne stava abbottato comme a rruospo, e
non sapeva che partito pigliare pe scetare lo ngiegno de sto figlio
sciaurato, e no lassare lo regno ’n mano a no mammalucco, sapenno
essere mpossibile cosa, fare lega la gnoranzia, e dominio de no regno.
A sto medesemo tiempo nc’era la fegliola de la Baronessa Cenza, che pe
tanto sapere, a lo quale era arrivata ’n tridece anne, n’acquistaje
lo nomme de Sapia; le bertolose qualetà de la quale essenno dette
a lo Rrè, fece pensiero de dare lo figlio a la Baronessa, che lo
facesse nvezzare da la figlia, penzanno, che co la compagnia, e co la
competenzia de la fegliola, avesse fatto quarche bene. Puosto addonca
lo Prencepe a la casa de la Baronessa, accommenzaje Sapia a nvezzarele
la santa-croce; ma vedenno, che le belle parole se le semmenava
da dereto, le bone ragiune da n’arecchia le trasevano e da l’autra
scevano, le scappaje la mano, e le dette no boffettone; de la quale
cosa se pigliaje tanto scuorno Carluccio (che accossì se chiammava
lo Prencepe) che chello, che non aveva fatto pe ccarezzielle, fece pe
bregogna, e despietto, tanto che ’n poche mise non sulo seppe lejere;
ma passaje tanto nnante a la grammatica, che fece pe tutte regole, de
la quale cosa appe tanto giubelo lo Patre, che non toccava pede ’n
terra; e levato Carluccio da chella casa, le fece studiare l’autre
ccose cchiù granne, che deventaje lo cchiù ssaputo de chillo regno:
ma fu ttanto la mpressione de lo cuorpo, che le dette Sapia, che
veglianno lo teneva nnante l’uocchie, dormenno se lo nzonnava; tanto
che fece pensiero de morire, o de vennecarese. Venne fra sto tiempo
Sapia a l’ajetà de marite, e lo Prencepe, che aspettava co lo miccio a
la serpentina, accasione de fare le bennette soje, disse a lo Patre:
Signore mio, io confesso d’avere recevuto l’essere da vuje, e perzò
ve tengo n’obreco nfi ncoppa l’astraco: ma a Sapia, che m’ave dato lo
buono essere, mme canosco autro tanto obrecato: e perzò non trovanno
manera vastante de pagarele tanto debeto, se ve fosse ’n piacere,
la vorria pe mmogliere, assecurannote, ca mettarrisse na cota sopra
la perzona mia. Lo Rrè, che ntese sta deleberazione de lo figlio, le
respose; figlio mio, si bè Sapia non è de chella carata, che doverria
essere na mogliere toja, pure co la vertute soja posta a la velanza
de lo sango nuostro scenne tanto, che le pò fare sto partito; perzò
tu contento, io pagato; e fatto chiammare la Baronessa, fece fare
subeto li capitole, e ffatto ffeste competente a no Segnore granne,
cercaje ’n grazia a lo Rrè n’appartamiento spartato, dove potesse
stare co la mogliere; e lo Rrè pe ccontentarelo, le fece apparecchiare
no Palazzo bellissemo separato da lo sujo, dove portatose Sapia,
la restrense a na cammara, dannole male da magnare, peo da vevere,
e ccotte peo non volenno pagare lo debeto; tanto, che la negra se
vedde la cchiù desperata femmena de lo munno: non sapenno la causa
de sto male trattamiento a ttiempo, ch’appena era trasuta a la casa:
ma venuto voglia a lo Segnore de vedere Sapia, trasette a la cammara
soja, e l’addemmannaje comme steva: Menate la mano pe lo stommaco,
respose Sapia, ca vedarraje commo pozzo stare, e che cosa t’aggio
fatto, pe la quale mme tratte de sta manera comme a ccane? A che
fine cercareme pe mmogliere, si mme volive tenere peo de na schiava?
a ste parole respose lo Prencepe; non saje tu ca chi fa l’affesa la
scrive ’n porvere, e chi la receve ’n marmolo. Allecordate buono,
che mme faciste quanno mme mmezzave de lejere, e ssacce ca non ped
autro t’aggio voluto pe mmogliere, che pe ssauza de sta vita toja,
e mmennecareme de la ngiuria recevuta. Addonca, leprecaje Sapia,
arrecoglio male ped avere semmenato bene. S’io te dette, lo ffice ca
jiere n’aseno, pe ffarete deventare Sapio. Tu saje ca chi te vole
bene te fa chiagnere, e chi te vole male te fa ridere. Lo Prencepe
se primmo steva marfuso de lo boffettone, mo se nzorfaje pe bederese
renfacciata la gnoranzia soja, e ttanto cchiù, che dove pensava, che
Sapia devesse darese ’n corpa de l’arrore, vedde, che ardita comme a
gallo le responneva da tuzzo a tuzzo, e perzò votatole le spalle, se
nne jette, lassannola peo che non steva: ma tornato fra cierte autre
juorne, e ttrovatala co lo stisso appontamiento, se nne partette cchiù
ncotenuto de primmo, resoluto de farela cocere co l’acqua soja comme a
ppurpo, e ccasticarela co la mazza de la vammace. Fra sto miezo lo Rrè
fece cessione de li bene de la vita ncoppa a na colonna de no lietto
martoro, e rrestato isso dommeno, e dommenanzio de tutte li state,
voze ire a pigliare lo possesso de persona, e mese ’nn ordene cavarcate
de gente d’arme, e de Cavaliere degne de la perzona soja, co li quale
se mese ’n viaggio. La Baronessa, che, saputo la vita stentata de la
Figlia, pe rremmediare prudentemente a sto desordene, aveva fatto na
cava pe ssotto lo palazzo de lo Prencepe, pe dove soccorreva de quarche
refrisco la poverella Sapia: previsto poche juorne nnante la partuta de
lo nuovo Rrè, fece fare carrozze, e livrere de sfuorgio, e bestuta la
figlia de tutto punto, co na compagnia de Signore la fece ammarciare
pe na strata scortatora, tanto che se trovaje no juorno nnante dove
aveva da fermarese lo marito, e pigliato la casa ncontro lo Palazzo,
che l’aveva apparecchiato, se mese tutta apparata a la fenestra, dove
arrivato lo Rrè, e bisto lo sciore de lo pegnato de le grazie, se
nne ncrapicciaje subeto, e fece tanta zappe, che l’appe ’n mano, e
lassatala prena, le dette no bello vranchiglio pe mmemoria de l’ammore
sujo; ed essennose partuto lo Rè pe girare l’autre Ccitate de lo regno
sujo, essa sbignaje a la vota de la casa soja, e ’n capo de nove mise
fece no bello figlio mascolo. Ma tornato lo Rrè a lo capo de lo regno
sujo, tornaje a bedere Sapia; credenno de trovarela trapassata, ma la
vedde la cchiù ffresca de maje, e cchiù che mmaje ostenata a direle,
che pe farelo sapio, dov’era n’aseno, le segnaje cinco dita ’n facce.
Lo Rrè sdegnato se partette, ed avenno a tornare fore a l’autra viseta,
Sapia co lo consiglio de la mamma fece lo medesemo, ch’aveva fatto la
primma vota, e godutase lo marito, n’appe na ricca gioja pe portare
’n testa, e nne restaje prena de n’autro figlio mascolo, che tornata
a la casa, comme fu ammaturo lo tiempo, scarrecaje, e ssoccessole la
terza vota sto chiajeto, le fu dato da lo Rrè na grossa catena d’oro,
e prete preziose, e la lassaje graveta de na figlia femmena: la quale
scie a ppuorto a lo tiempo debeto, e benuto lo Rrè da fore, trovaje,
che la Baronessa avenno dato l’adduobbio a la figlia sparze voce,
ch’era morta, e mmannatala ad atterrare, destramente la fece pigliare
da la fossa, e annasconnere drinto la casa. Pe la quale cosa lo Rrè co
na festa granne trattaje n’autro accasamiento co na perzona granne,
la quale portatala a lo Palazzo riale, mentre se facevano feste da
stordire, comparze Sapia a la sala, co li tre figlie, ch’erano tre
gioje, e ghiettatase a li piede de lo Rrè, cercaje justitia, che non
dovesse levare lo regno a sti figliule, ch’erano lo sango sujo. Lo Rrè
pe no piezzo stette comme a n’ommo, che se nzonna. All’utemo vedenno,
ca lo ssapere de Sapia arrivava a le Stelle, e bisto appresentarese
quanno manco se lo credeva tre ppontelle de la vecchiezza soja, se le
ntennerette lo core, e dato chella Segnora pe mmogliere a lo frate co
gruosso stato, se pigliaje Sapia, facenno canoscere a la gente de lo
Munno,
_Ca l’ommo Sapio dommena le Stelle._