Tho' Scot, maior. Raffe Joslyn. Vic'. A^{o}. xxxvij.
Ric' Nedeham.
[Sidenote: Comes Sar'.]
In this yere was affrey bitwene gentilmen of Court and men of
Fletestrete; and the gentilmen were driven with archers fro the
standard in Fletestrete into theire Innes, and some were slayne and
some taken the xiij day of Aprile: wherfore William Tailour alderman
of Fletestrete ward, with other mo, were afterward sent to Wyndisore
castel, and there kepte as prisoners. And sone after, kyng Henry, the
quene and lords, lete make a grete gaderyng of people northward,
wherof was grete noise: than therle of Warwike came frome Caleise
thurgh London, and his fader therle of Salisbury came fro Middilham
toward the duke of Yorke with iij m^{l} men; and the quene Margrete
lay by the way as he come with xiiij m^{l} of the floure of
Chestreshire, Lancastreshire and Derbyshire, which set upon the seid
erle of Salisbury and his compeigny at Blore heth, the xxiij day of
Septembre; and there were slayne of the quenes partie the lord Awdley,
with many knyghts, squiers, and other people, the seid erle holdyng
his wey to Ludlowe, where he mette with the duke of Yorke and his
sones therles of the Marche and Ruthland, and therle of Warwik
aforseid; and toward them came kyng Henry with l m^{l} men. And in the
nyght the duke of Yorke and his sones, and therle of Salisbury with
his sone, voidid into Walis; and there departid the duke of Yorke with
his seconde sone therle of Ruthland into Irland; and therles of
Marche, Warwik and Salisbury, bought a ship, and so gete to Caleise
and there were received.