Rob't Clopton, Will'm Combe, fysshmong'. A^{o}. xx^{mo}.
drap', m^{or}. Ric'us Riche, merc'.
[Sidenote: Talbot was made erle of Shrewesbery.]
[Sidenote: Gascoyn and Gyan loste.]
In this yere[127] my lady of Gloucestre hadde confessyd here
wichecraft, as it is afornseid she was yoyned be alle the spriualte
assent to penaunce; to comen to London fro Westm' on the Moneday next
suynge and londe at the Temple brigge out of here barge, and
there[128] she tok a taper of wax of ij^{lb} in here hond, and wente
so thorugh Fletstrete on here foot and hoodles unto Poules, and there
she offred up here taper at the high auter; and on the Wednesday nest
suenge she com fro Westm', be barge, unto the Swan in Tempse strete,
and there she londyd, and wente forthe on here feet thorugh Brigge
strete, Groschirche strete, to the Ledenhalle, and so to Crichirche in
the wyse afornseyd; and on Fryday she londed at Quen hithe, and so
forth she wente into Chepe, and so to seynt Mighell in Cornhull, in
the forme afornseid; and at iche of the tymes the mair with the
schirreves and the craftes of London were redy at the places there she
sholde londe: and after, Roger the clerk afornseyd on the Satirday,
that is to sey the xviij day of Novembre, was brought to the
Yeldehalle, with Sire John Hom prest, and William Wodham squyer, the
whiche S^{r}. John and William hadden there chartres at that tyme;
and the clerk was dampned, and the same day was drawe fro the Tour of
London to Tiborn, and there hanged, hedyd, and quartered, and the heed
sett upon London bregge; and his oo quarter at Hereford, another at
Oxenford, another at York, and the fourthe at Cambregge; and the lady
put in prison, and after sent to Chestre, there to byde whill she
lyvyth. Also the same yere was a parlement, and it began at Cristemas
and lasted til Estre; at the whiche parlement was ordeyned that the
see schulde ben kept half a yere at the kynges coost, and therfore to
paye an holl fyftene, and London to lene hym iij m^{l} lib'. And that
yere, the laste day of ---- save on, there was a batayle in Smythfeld,
withinne lystes, aforn the kyng, betwen the lord Beaufe a Arrogonere,
and John Ashele squyer of the kynges hous, a chalange for spere to
caste pollex and dagger at the lord aforeseyd in brekynge of his
gauntelette and reysyng of his umbrary, and hadde hym at myschief redy
to a popped hym in the face with his dagger, tyl the kyng cried hoo:
and there the seid Asshle was mad knyght in the feld.[129] Also in
this same yere come the lord Talbot out of Fraunce and was mad erle of
Schrovesbury, and wente over into Fraunce ayen with iij m^{l} men. And
in this yere come tidynges unto the kyng that Gascoigne and Gyan was
lost, save Burdeux and Bayon, be the Armynakes take: in the mene tyme
ambassatours of the same partye of Armynackes were come unto the kyng
to entrete for a mariage of the erle of Armynakes doughter to be
weddyd to the kyng; but because of the same treson the seid mariage
was daisshyd. Also this same yere wente a werre in foure parties of
Engelond, of every coost xxiiij schippes a werre. And in that same
yere com hom out of Fraunce the erle of Ewe and S^{r}. James of Urmond
into Engelond.
[Footnote 127: "Alianor Cobham" _in the Cotton MS._]
[Footnote 128: "openly barehede with a keverchef on hir hede beryng,
&c." _in the Cotton MS._]
[Footnote 129: "be the kyngs hande for his wel doyng, and afterwarde
the lord offered up his harness at Wyndesore" _in the Cotton MS._]