John Welles, groc', maior. John Atherley. A^{o}. x^{mo}.
Stephan Broun.
[Sidenote: Kyng Herry was crowned kyng of Fraunce.]
This same yere, the xvj day of Decembre, G beynge the dominical
lettre, kyng Herry the vj^{te} was crowned kyng of Fraunce at Parys,
in the chirche of Notre Dame, with gret solempnyte and rialte; and
anoon after he turned ayen into Engelond, and landed at Dovorr the ix
day of Feverer', and come to London the xxj day of the same month,
where he was ryally resceyved, alle the craftes rydynge ayens hym all
in white.
John P'ueys, drap'. John Olneye, m'c'. A^{o}. xj^{mo}.
John[117] Pattesley, jueler.
[Footnote 117: "Robert" _in the Cotton MS._]
[Sidenote: Soudeors were arest.]
[Sidenote: The regent of Fraunce was wedd.]
[Sidenote: Sowdeors of Caleys were banschyd and some ded.]
This same yere the duke of Bedford regent of Fraunce com to Caleys the
Tuesday before Estre day;[118] and in the morwe after the sowdeours
were arested and put into warde: and in the Estre woke the forsaid
regent rood into Picardie to Tyrywe, and there the bysshop of Tyrewyn
dede wedde the regent to the erles doughter of Seynt Poule; and whanne
they were weddyd he com to Caleys ageyn: and the xj day of Jun, on
seynt Barnabe day, were foure sowdeours of Caleys beheded; that is for
to sey, John Maddeley, John Lunday, Thomas Palmere, and Thomas Talbot;
and v score and x banshyd that same tyme, and before that tyme were
banshyd vj score; and so on Midsomer-even after com the regent and his
lady to London, that faire citee.
[Footnote 118: _See note_ XX.]