Will's Waldern, Will' Estfeld, m'c'. A^{o}. p^{o}.
m'c', maior. Rob't Tatersale, drap'.
[Sidenote: A parlement at Westm'.]
[Sidenote: The governaunce of the K. was ordeyned by parlemente.]
[Sidenote: W^{m}. Tailor an heretyk was brent.]
This same yere upon a Wednesday the xxj day of Octobre, on the morwe
be vj[107] and vij on the belle, deyde kyng Charles kyng of Fraunce
the kynges aiel of Engelond, in his ostell of seynt Poule withinne
Parys, whos body was worthyly entered in seynt Denys. Also the vij
daye of Novembre the same yere, oure kyng Herry the fyfthe nobely was
entered at Westm'. Also in this yere the kynges parlement was holden
at Westm', which parlement began the Moneday nest before the feste of
seynt Martyn, that is to seye the ix day of Novembre, in whiche
parlement was ordeyned the governaunce of the kyng, how and in what
manere he schulde be governed in his tender age.[108] Also in this
yere on the firste day of March Maistr' William Taillor prest, was
disgraded of his ordre of presthood; and in the morwe after he was
brent in Smythefeld for certeyn poyntes of heresye.
[Footnote 107: "in the morning between," &c. _in the Cotton MS._]
[Footnote 108: _See note_ NN.]