Ric' Whytyngton, John Boteler, m'c'. A^{o}. vij.
m'cer, maior. Rob't Whytyngton, drap'.
[Sidenote: The weddyng of the kyng and quene Kateryne in Fraunce.]
[Sidenote: The sege of Melau and of manye mo citees, townes and
castell.]
This same yere was the kyng Herry the fyfthe mad heir and regent of
Fraunce, and wedded to dame Katerine the kynges doughter of Fraunce,
at Troys[104] in Champayn, upon Trynyte Soneday; and anoon after he
hymselfe and hise lordes, with the duke of Burgoyne and manye othere
ryalles of Fraunce, wenten and leyd sege to manye diverses citees,
townes and castellys, whiche weren holden with the dolphyns men and
Armenakes, and wan them; but Melau sur Seyne was on of the werste that
evere he leyde sege to, for ther was inne a schrewd meyne of rebelles.
[Footnote 104: _See note_ KK.]
Will's Cambregge, John Boteller, drap'. A^{o}. viij^{o}.
groc', maior. John Welles, groc'.
[Sidenote: The coronacion of the quene at Westm'.]
[Sidenote: A parlement at Westm'.]
[Sidenote: The kyng ordeyned certeyn weyghtes for gold.]
[Sidenote: The deth of the duke of Clarence.]
[Sidenote: The town of Mileu was yolden.]
This yere on Candelmasse day be the morwe the kyng come into Engelond
with hys quene, and landed at Dovorr; and on the xiiij day of Fever,
upon seynt Valentynes day, the kyng come to London; and the xxj day of
the same monthe the quene come to London; and on the xxiij day of the
same monthe sche was crowned at Westm'.[105] Also this same yere,
anoon after Estren, the kyng helde his parlement at Westm'; in whiche
parlement was ordeyned, that no man after Cristemasse thanne nest
folwynge schulde putten forth no proffre no gold in payment but yf it
held the weyte, wherfore the most part of the peple ordeyned them
balaunces and weytes. And anoon after Pentecost the kyng seiled over
the see to Caleys, and passyd forth into Fraunce. This same yere upon
Estre even afore noon, that is for to say the xxij day of March, the
yere of oure lord a m^{l}ccccxxj, the duke of Clarence with manye
other lordes were sclayn beyounde the water of Leyre in Fraunce; and
manye lordes were taken prisoners the same tyme, of the whiche the
erle of Hunt', and the erle of Somerset with hys brother, were
principales. Also the same yere, betuen Cristemasse and Candelmasse,
the town of Mileu' was yolden to the kyng, and alle cheveteyns with
the sowdyours were ledd to Parys in the croke of the mone they myght
seyn, for of them there skaped thens but fewe on lyve.
[Footnote 105: _See note_ LL.]