Will Walworth, m'. Walt' Coket. A^{o}. iiij^{to}.
fysshmong'. Will' Knyghtcote.
[Sidenote: The rysyng of the co'es of Essex and Kent.]
[Sidenote: They brende Saveye.]
[Sidenote: Jake Strawe was sclayn.]
This yere was the rysyng of the co'es of Essex and of Kent, for a
talaye ordeyned that every man and woman betwen the age of lx and xvj
yere schulde paye to the kyng xij _d._; the whiche comones brenden the
chirche and the houses of seynt Jones at Clerkenwelle, and at the Tour
hill they beheded maistre Simond Sudbury, than erchebysshop of
Caunterbury and chaunceller of Engelond; and frere Robert Hales priour
of seynt Jones hous, thanne tresorer of Engelond; and frere William
Appulton a grey frere, because he was phisicion to the duke of
Lancastre, and Roger Leche sergeaunt of armes; and Richard Lyons was
beheded at the standard in Chepe; and Richard Somere was beheded at
the Milende; and Legat of Holbourn was beheded at Goterlane ende in
Chepe; and manye questmongers, jorours, men of lawe, Flemynges, and
othere aliens as they comen to honde they were beheded in diverses
places. And thise said arrysers brenden the dukes place of Lancastre
called Saveye, and wolde fayn an had the duke of Lancastre, but as
grace was he myghte not be founden: and this was don on Corpus Cristi
day, thanne beynge on the xj day of Juyn the yere of oure lord a
m^{l}ccclxxxj. And on the morwe after, that is to saye Fryday, and
thanne on the Satirday after Corpus Cristi day, the kyng anon after
rood into Smythfeld, and William Walworth thanne beynge maire of
London, S^{r}. Robert Knolles and also aldermen and othere citezeins
of London with hym: and there they metten with Jake Strawe ledere of
the uprysers. And this Jake Strawe spak to the kyng heded as it hadde
be to his felawe: and John Blyton that bar the maires swerd of London
bad hym don of his hode while he spak to the kyng; wherfore Jake
Strawe wax an angred, and mynte to caste his daggere to Blyton. And
thanne William Walworth, maire of London, drewe his baselard and smot
Jake Strawe on the hed: and with that, Rauf Standyssh, that bar the
kynges swerd, roof Jake Strawe thorugh the body with a swerd; and
there he fyll doun ded. And anon his hede was smeten of and sett on a
pole. And there the kyng made knyghtes, that is to seye, William
Walworth maire of London, Rauf Standyssh, Robert Launde, Nicholl
Brembre, Nicholl Twyford, and John Philpot. And anoon they wenten into
seynt Jones feld, and there they founden alle the arrysers. And anon
they were besett aboughte with the peple of London, so that they might
non of them escape away: and thanne the kyng dede crye that no man
schulde don them bodyly harme; and they were fayne to escape awey with
there lyfves, and left there wepenys behynde them. Nevertheles
afterward manye of them weren arrested, and be the lawe don to the
deth in diverses schires of Englond, some drawen and hanged, and some
hanged, and some beheded.