Nicholl Batte, m'. John Northampton. A^{o}. xxxvij^{o}.
Richard Pychard.
This yere the quene, and Edward here sone, and Boneface the
erchebysshop of Caunterbury sailed over the see toward Burdeux. Also
this yere, the day of S^{t}. Paulyne the bysshop, fell manye mervailes
be the watres of the see, as full grete hete and droughte.
Ric' Hardell, m'. Rob^{t}. Lyntone, drap'. A^{o}. xxxviij^{o}.
Will'm Asshwy, merc'.
In this yere Edward the kynges sone spoused the kynges suster of
Spayne. Also in this yere the kyng com from Burdeux thorugh Fraunce,
and arryved at Dovore on Cristemasse day: and on seynt John day he com
to London, and enprisoned the schirreves in the tour of London a
monyth and more, for on John Frome that was undyr there warde whiche
escapyd out of Newegate, the whiche John was taken in warde for the
deth of a priour that was the kynges alye; and new schirrefs mad, as
it folowith.
Id'm maior. Stephan Distergate.[7] A^{o}. xxxix^{o}.
Herry Walmode.
Id'm maior. Matheu Bokerell. Anno xl^{o}.
John le Mynour.
[Footnote 7: Oyster-gate _in the Cotton MS._]
[Sidenote: Obiit R. Grosted ep'us Lincoln'.]
[Sidenote: The crucifienge of a child.]
This yere deyde Robert Grostede bysshop of Lyncoln, in the vij idus of
Octobre. And in this yere, the Soneday before the translacion of seynt
Edward, the wyf of S^{r}. Edward the kynges sone com into Engelond
and to London; and S^{r}. Edward com hymself on seynt Andrew evene to
London. And in this yere a litell child called Hughe of Lincoln was
taken of Jewes and crucified.