Id'm maior. Ric' Reng'. Anno v^{to}.
John le Josne.
[Sidenote: Plees of the crowne. Castell of Bedf' was stroid.]
[Sidenote: Ordre of Frere Carmes began.]
[Sidenote: A gret wynd.]
[Sidenote: Firy dragons were seyne.]
This yere of oure lord a m^{l}ccxxiiij,[3] the emperour Baldewyn which
whanne he wente to bataile to fyghte with Godes enemyes he hadde a
croos boren before hym, whiche crosse seynt Eleyne made of the crosse
that Cryst deyde upon; and there was an Englyssh prest that tyme with
hym that was called S^{r}. Hughe, and he was borne in Norfolke, the
whiche preest broughte the same crosse to Bromholm in Norfolke. Also
in this yere the plees of the crowne were pletyd in the tour of
London. Also in this yere was the castell of Bedford beseged, whiche
endured fro the ascencione of oure lord unto the assumpcion of oure
lady; at whiche day be greet crafte and strong assaught it was wonne
and distroid: and sithe it was not beldyd ayeyne because it was rebell
to the kyng. Also in this yere began the ordre of Frere Carmes. Also
in this yere upon seynt Lukes day there blew a gret wynd out of the
north, whiche caste doune manye houses, steples and torrettes of
chirches, and turned up so downe trees in wodes and in orchardes, at
whiche tyme fyry dragons and wykkes spirytes grete noumbre were seyn
openly fleyng in the eyre.
[Footnote 3: _Sic in the Harl. MS., and_ m^{l}ij^{c}xxiij _in the
Cotton MS._]
Id'm maior. Ric' Reng'. Anno vi^{to}.
Th' Lambard.
This yere a gret discencione aros in London be empechement of Walter
Bokerell, so that Constantyne Fitz Arnulf the morwe aftere oure lady
daye, the assumpcion, was drawe and hanged. And in this yere the kyng
was purposed to have cast down the walles of London.